Leksyon sa Titanic

CEBU, Philippines - Overloading. Kini maoy sagad nga hinungdan sa trahedya sa mga pasaheroang barko nga mikalas na og liboang kinabuhi ilabi na kung maabayan sa dautang panahon.

Ang Philippine Coast Guard-7 ug ang maritime sektor sa uwahing selebrasyon sa 2012 National Maritime Week subling mituki niini ug mipalig-on sa ilang sektor ug gikuhaan og sanglitanan ang gidangatan sa makasaysayanon apan gidemalas nga barkong Titanic.

Ang tema sa 2012 National Maritime Week nga bag-ohay lang natapos mao ang: “100 Years after Titanic: Lessons From Disasters” nga nalunod niadtong Abril 15, 1912 ug mikalas og dul-an 2000 ka pasahero.

Gibasol sa maong aksidente ang kawalay kabangkaagan sa kapitan sa safety, ang kakulang sa tukmang gidaghanon sa lifeboats ug lifejackets alang sa tanang pasahero, overloading, kakulang sa training sa mga tripulante ug uban pa.

Matud pa sa usa sa mga opisyal sa Philippine Coast Guard (PCG)-7 nga si Commander Commodore William Melad nga dili na mausab pa ang susamang senaryo sa Titanic karong mga panahona .

Sumala pang Melad nakat-on na sa mga nangaging mga trahedya sa kadagatan ang mga shipping companies ilabi na ang pagkontrol sa gidaghanon sa ilang mga pasahero ug kargamento ug ang hustong pagbansaybansay sa ilang mga tripulante panahon sa disgrasya.

 Ang PCG dunay dakong papel niini aron pagsigurong sundon ang mga Maritime Laws ug Safety ug Security Rules sa paglawig sa mga barko pinaagi sa ilang regular nga inspeksyon sa matag mobiya ug moabot nga barko.

Gidayeg hinuon ni Melad ang shipping companies nga misunod sa mga lagda ug mandates alang sa luwas nga paglawig. (BANAT NEWS)