Suga nga pink gipasiga sa Capitol

CEBU, Philippines - Gipasiga ang tanang suga nga may kolor pink sa atubangan sa Provincial Capitol sayo niadtong Oktobre 1, 2012 agi og duyog sa kagamhanan sa lalawigan sa kasaulogan sa Breast Cancer Month ning buwan sa Oktobre.

Ang pagpasiga sa mga suga nga may kolor pink nahimo pinaagi sa mando nga giluwatan ni Gobernador Gwendolyn Garcia kinsa miila sa kamahinungdanon ning maong kasaulogan tungod kay usa kini sa mga paagi aron ang mga kababayen-an magpakabana sa pag-atiman sa ilang lawas aron kalikayan ang sakit nga kanser sa suso.

Ang gobernador mismo mipahayag sa tanang mga kawani nga babaye sa Kapitolyo nga angay magmatngon sa sakit nga kanser pinaagi sa pagpahiling  sa lawas   matag karon ug unya.

Kini aron pagsiguro nga mintras gamay pa masanta dayon pinaagi sa paghatag og sayo nga tambal.

Iyang gipasabot nga ang sakit nga breast cancer anha na mamatikdi sa tagtungod kun manghubag na ang  suso kay sa gamay pa wala kini atimana sa pagpatambal.

Tungod kay matawag na nga stage 4 , ang tagtungod sa panglawas lisud na nga malibre. Busa dinhi sa kasaulogan sa Breast Cancer Month, gidasig ang tanang kababayen-an sa pagpahiling sa ilang suso sa mga klinika nga gibuksan alang niini nga libre .

Kini aron sa pagsiguro nga maluwas ang may sakit nga breast cancer gikan sa tino nga kamatayon. (BANAT NEWS)