CEBU, Philippines - Nakabsan sa kinabuhi ang usa ka mananagat human mabitik sa iyang kaugalingong pasol ug nalumos didto sa kadagatan sa barangay Hagdan lungsod sa Oslob kagahapon sa alas 2:00 sa sayong kaadlawon.
Ang biktima mao si Fidel Mendez Doroon, 58, minyo, mananagat, nga taga Sitio Himaypayan, barangay Tumalog lungsod sa Oslob.
Si PO1 Jun Jerusalem sa Oslob Police Station mibutyag sa Banat News nga samtang namingwit ang biktima gamit ang nylon nga pasol luwan sa iyang sakayan mga alas 2:00 sa kaadlawon aksidenti kining natagak gikan sa iyang sakayan nga nakit-an sa ubang mga mananagat.
Dihang ilang gisusi nakurat na lang sila dihang nadiskobrehan nila nga patay na kini samtang ang iyang tuong pulso nagapos nga hugot kaayo sa iyang pasol nga nylon.
Gituohan sa ubang mga mananagat nga gikubit og dakong isda ang pasol sa biktima ug kumo kay nagaid man ang pasol sa iyang pulso samtang milugnot ang isdang mikubit sa iyang pasol, natagak siya sa dagat ug naglisud na pagkapay-kapay sa kamot kay nahiktan man sa iyang pasol.
Hinuon girekomendar sa kapolisan nga ipaubos sa autopsy ang biktima aron matino kun wala bay foul play ang kamatayon niini. (BANAT NEWS)