Mga PWD may kaugalingong presinto

CEBU, Philippines - Gahinan sa Commission on Election (Comelec) og kaugalingong voting precinct ang mga PWD kon persons with disabilities karong umaabot   nga election sa sunod tuig.

Nagpasabot kini nga usahon na lang ang voting precinct sa tanang PWD sa syudad sa maong higayon. Ang Comelec miawhag sa tanang level sa buhatan sa Comelec nga ibutang ang mga presinto sa mga PWD sa ubos nga bahin sa mga eskwelahan aron di na sila maglisod sa pagsaka sa hagdan.

Kining maong kalamboan nahimo nunot sa   dugay na nga mga hangyo sa mga PWD ngadto sa Comelec nga lainon ang ilang sentrong botohanan sa panahon sa piniliay.

Kini tungod kay daghan kaayong may apan sa panglawas nga wala makabotar sa milabayng mga election tungod kay gitipon sila sa mga maayo og lawas ug kasagaran kanila maawahi kay lupigon man sila sa mga maayo og lawas nga botante.

Samtang ang election officer sa Cebu City North District nga si manlalaban Marchel Sarno mibutyag nga mokabat sa usa ka libo kapin ka PWD   nga botante ang narehistro   karon sa Siyudad sa Sugbo.

Giingong makig-alayon usab ang Comelec ngadto sa buhatan sa Department of Education aron mapangitaan og paagi nga mapahimutang og hustong lawak ang mga botante nga may apan sa panglawas. (BANAT NEWS)