CEBU, Philippines - Duha ka mga trabahante ang gipamusil patay sa managlahing hitabo sa lalawigan sa Sugbo niadtong Lunes sa gabii.
Sa San Fernando, patay ang 37-anyos nga caretaker sa poultry farm nga si Roberto Serrano samtang paingon unta kining motrabaho sa poultry farm sa sitio Guia sa barangay Upper Panadtaran lungsod sa San Fernando alas 9:00 sa gabii niadtong Lunes.
Matud ni PO1 Janel Figura sa San Fernando Police Station dihang nahinabi sa Banat News sa dayong abli sa biktima sa gate sa trabahoan kalit kining giduol ug gipusil sa usa ka lalaking giingong nag-atang nang daan kaniya.
Ang biktima naigo sa dughan ug human sa hitabo daling midagan ang duha ka mga lalaki nga gidudahang nailhan sa mga saksi. Ang asawa sa biktima mibutyag sa kapolisan nga daan na siyang gisultihan sa biktima nga duna kini nakaaway nga kauban sa trabaho.
Sa laing insidente sa pagpamusil, usa ka Allan Dacillo Apostol, usa ka construction worker ang kalit gipusil sa usa ka Lito Mayormita nga usa ka mananagat.
Matud ni PO1 Mauro Gramatica Jr., sa Badian Police Station dihang nahinabi sa Banat News luwan sa motor ang biktima dihang kalit gipusil sa suspek samtang duna kini kaestorya tungod sa usa ka videokihan.
Patay na kini pag-abot sa Badian District Hospital samtang gipangita pa ang suspek ug gitino pa ang motibo niini. (BANAT NEWS)