17 angol sa nalimbuwad nga trak

CEBU, Philippines - Naangol ang 17 ka mga trabahante dihang ang trak de karga nga ilang giluwanan nga nagdagan sa dalan Ouano Avenue sa reclamation area sa dakbayan sa Mandaue kalit lang nabangga sa center island ug nalimbuwad.

Ang maong sakyanan nga gimaneho ni Jovenile Sasa, 20, maoy gisakyan sa mga trabahante sa Global Construction sa dakbayan sa Sugbo nga padulong unta sa ilang mga panimalay.

Ang mga naangol nga mga trabahanteng nagsakay sa maong trak mao sila si Ruel Gonzales, 24, Jerry Sinse, 24, Bienvienido Gariado Jr., 46, Dennis Sandajon, 39, Nonilo Yamson, 34, Jonathan Palcente, 28, Joefrey Oglang, 23, Erwin Gonzales, 28, Rosito Alba, 29, Benjie Alba, 29, Dindo Bihag, 22, Carno Waletes, 31, Dennis Misajon, Greggy Conge, 24, ug Joseph Ballesteros, 21, pulos nagpuyo sa barangay Looc sa maong dakbayan. Si SPO2 Eduardo Flores sa traffic division sa Mandaue City Police Office (MCPO) nga nahinabi sa Banat News miingon nga gikan ang trak sa dakbayan sa Sugbo ug pag-abot sa maong dapit kalit lang dunay tawong milabang ug sa paglikay sa drayber nabangga kini sa center island hinungdan sa pagkalimbuwad niini. (BANAT NEWS)