CEBU, Philippines - Ang 16-anyos nga inahan nga mipatay sa iyang kaugalingong anak sa Moalboal naglaraw nga mapadayon ang pagtungha sunod tuig bisan pa sa nahitabo.
Ang inahan nga anaa pa gihapon sa Don Vicente Sotto Memorial Medical Center tungod sa naangkong samad tungod sa iyang pagdunggab sa iyang dughan human patya iyang anak mibutyag nga mo-enroll na siya sa Moalboal National High School aron mogradwar siya bisan sa high school.
“Gusto ko makatrabaho kung wala koy bad record tungod sa akong nabuhat,” matud niya.
Giangkon sa inahan nga napatay niya iyang anak apan matud niya wala na siya nakahinumdom sa mga panghitabo dihang gisigehan na niya sa pagdunggab ang iyang anak.
Siya midugang nga nagsagol iyang gibati adtong higayuna kay aduna siyay kasuko sa amahan sa anak unya napun-an kini dihang adunay daghang rashes sa pamanit sa bata.
“Na-demonyohan naman ko ato panahona wala nako kahibawo sa akong nabuhat,” matud niya.
Ang inahan giingong mipatay sa iyang anak niadtong Domingo sa hapon gamit ang 12-pulgadas nga kutsilyo ug namatay ug pagkahuman nagdunggab sa iyang kaugalingon makaduha ka higayon.
Ang apuhan sa inahan mibutyag usab nga hangtod ron wala pa gihapon siya masayod nganong nabuhat kini sa iyang apo nga pinangga man niini ang bata.
“Ambot hangtod ron wala pa man ko katuo ambot ba wala ko kasabot,” matud sa apuhan kinsa maoy nag-atiman sa manag-inahan sa ilang balay sa Moalboal ug unang nakatabang pagkadungog sa siyagit sa apo.
Si Lina Aquino, Municipal Social Welfare Development Officer, mibutyag usab nga padayon nilang tabangan ang inahan labi na ang psychological intervention ug tabang pinansiyal.
“We will assist her throughout the process together with the DSWD-7,” matud ni Aquino. (BANAT NEWS)