CEBU, Philippines - Gipangunahan sa departamento sa kalikopan ang 1,500 kapin ka tawo nga misalmot sa clean-up drive o pagpanghinlo sa 19 ka mga barangay sa syudad sa Mandaue sa miaging adlaw.
Ang Environmental Management Bureau (EMB)7 sa Department of Environment and Natural Resources (DENR) maoy nanguna sa maong aktibidad uban sa Armed Forces of the Philippines, Philippine National Police, Department of Public Works and Highways, mga negosyante sa pribadong sector ug mga opisyal sa local nga kagamhanan sa maong dakbayan.
Sa maong kalihokan gipadangat sa mga nagpasiugda ang tukmang impormasyon ngadto sa komunidad bahin sa pagprotiher sa kasapaan nga gihimo na nga labayanan sa mga basura sa katawhan.
Matud pa ni DENR-7 Executive Director Isabelo Montejo nga ang mga kasagarang nakolekta nga basura sa mga molupyo sa barangay nga gipangunahan sa mga opisyal sa local nga kagamhanan mao ang mga plastik partikular na sa mga sudlanan sa shampoo ug diaper.
Gani matud pa niya nga dul-ang 10,000 ka kilo niining maong matang sagbot ang nakolekta sa maong dinungan nga clean-up drive sa sapa sa Butuanon, Guindarohan ug Pilipog-Gabi, Tipolo, Jagobiao, Hipodromo ug estero sa Luknay.
Sumala pa ni Montejo nga mahinungdanon gayud kaayo ang nagpadayong suporta sa mga opisyales sa barangay ug ang koordinasyon niini lakip na ang komunidad sa pagmintenar sa malahutayong paggahin niini og kusog sa pagpanghinlo sa buwan sa Septembre.
Gipadayag ni Montejo nga buot nilang ipasabot ang hustong sanitasyon ug usab ang pagdumala bahin sa solid waste sa mga kasapaan ug estero sa komunidad pinaagi sa edukasyon ug aktwal nila nga partisipasyon sa clean-up drive sanglit sila man ang direktang makabenepisyo niini. Tumong usab sa maong aktibidad ang pagmenus sa insedente sa mga sakit nga makuha sa hugaw nga tubig sama sa cholera, diarrhea ug dengue partikular na sa mga kabataan. Base sa Presidential Proclamation No. 244, gideklarar ang buwan sa Septembre isip National clean-up month ni kanhi Presidente Fidel V. Ramos uban sa tema nga "Lets do it! World Clean up 2012."(Liezl M. Frasno /WC) (BANAT NEWS)