CEBU, Philippines - Samdan ang usa ka dalaga ug usa ka batang babaye, human kini maigo sa mga tipaka sa wala hisayri nga matang sa eksplosibo nga giitsa ngadto sa usa ka balay sa wala hiilhing tawo didto sa sitio Riverside, barangay Hagnaya lungsod sa San Remegio kagahapon.
Ang mga nakaangkon og samad mao sila si Nena Sala, 18, anak ni Julian Sala nga tag-iya og Tricycle Shop ug Gene Albones, 7, pulos molupyo sa maong lugar.
Sa pasiunang imbestigasyon sa kapolisan nasayran nga si Sala nanghugas sa mga plato dihang may mibuto sa shop sa iyang amahan tapad sa ilang balay ug naigo siya niini busa naangol siya.
Samtang ang 7-anyos nga silingan usab ni Sala kinsa naglakaw ug nahiagi lang sa maong lugar sa maong higayon, nasamad usab
Sa pakighinabi sa Banat News sa hepe sa kapolisan sa lungsod sa San Remegio, si Insp. Anecito Manluluyo mibutyag nga base sa iyang gilusad nga imbestigasyon murag nagtuo siya nga personal nga bangi ang hinungdan.
Matud pa ni Manluluyo nga aduna na silay gisubay karon nga anggulo kalabot niini ug ila pang tinuon ang mga gisumpay-sumpay nga mga estorya ug hitabo.
Mipasabot usab si Manluluyo nga ang amahan nga si Sala maoy gituohang may atraso nga personal ug mao karon ang usa sa ilang gisubay.
Samtang nakuha usab sa crime scene ang mga fragments o tipaka sa eksplosibong gilabay sa shop sa pamilyang Sala.
Hinuon ang duha ka biktima kinsa pulos nasabak sa tiil luwas na karon sa kahimtang ug padayon pang gihimo sa kapolisan ang imbestigasyon. (Lesley Caminade-Vestil/WC) (BANAT NEWS)