Consular office sa Mexico dinhi sa Sugbo subling buksan

CEBU, Philippines - Subling buksan sa kagamhanan sa Mexico ang ilang consular office dinhi sa Sugbo human sa 15 ka tuig nga pagtak-op niini.

Kini ang gitug-an ni Ambasador Tomas Javier Calvillo sa Mexico sa mga sakop sa Cebu sa iyang pagbisita sa buhatan ni Governor Gwendolyn Garcia sa miaging adlaw.

Sumala pa ni Ambassador   Calvillo nga una pa kining higayon nga may bag-o na silang natudlo nga consulado dinhi sa Sugbo nga mao si Honorary Consul Eduardo Graham Gonzales.

Pormal siyang gidestino dinhi uban sa iyang asawa nga si Therese Gonzalez nga usa ka suod nga higala ug classmate sa gobernador.

Matud pa sa embahador nga ang ilang consular office karon tua mahimutang sa dakbayan sa Mandaue nga natak-opan sulod sa 15 ka tuig.

Alang kaniya nga kining subli nilang pagbukas sa ilang consular office dinhi maoy labing mopalig-on sa kadugtongan tali sa Pilipinas ug sa Mexico.

Samtang sa bahin sa gobernador, iyang gipasabot nga dako kaayo niyang dungog   ug kalipay ang pagbukas sa consular office sa Mexico dinhi sa Sugbo.

Kini tungod kay ang Pilipinas ug Mexico managsama og kultura nga sarang makapalambo sa maayong kadugtungan sa duha ka nasud sa natad sa pamatigayon ug pagbinay-loay og kasinatian. (Chester Abadilla/WC) (BANAT NEWS)