Di matawag nga 'early campaigning'

CEBU, Philippines - Giklaro sa Commission on Election –Region 7 election officer nga si Atty. Temie Lambino nga walay malapas ang mga kandidatong incumbent officials nga mobutang dayon sa ilang mga posters bisan pa man nga nakaduso na sila sa ilang certificates of candidacy (CoC) sa ilang buhatan.

Matud pa ni Lambino sa report sa TV Patrol Central Visayas sugdan ang pag-regulate niini unya na sa campaign period sa Pebrero 12 hangtud sa Mayo 11 sunod tuig alang sa national level.

Samtang ang campaign period sa local level magsugod karong Marso 29 hangtud sa Mayol 11 sunod tuig diha pa lang mo-apply ang mga rekisitos sa pangampanya sama sa gidak-on sa mga campaign materials ingon man sa airtime sa mga politiko nga magpa-advertise sa mga radyo ug telebisyon.

Giangkon ni Lambino nga pabor kaayo kini sa mga incumbent nga opisyales sa gobiyerno ug kwartahan nga mga politiko gumikan kay makapatuyang pa sila sa pagplastar sa ilang mga dagway bahala’g bisan pila’y sukod nga poster sanglit wala pa man gasugod ang campaign period.

Sa pagkakaron ang mga incumbent officials nga mokandidato usab sa sayo pa mipahigayon na og mga pulong-pulong sa barangay nga kung buot paminawon pangampanya na gyud ang katuyoan.

“Day 1 was peaceful with no violent incidents recorded only few filed their COCs. Our deployment will continue as necessary,” matud pang Sr. Supt. Patrocinio Comendador sa Cebu Provincial Police Office. (Sanden J. Anadia ug Lesley Caminade/EIM) (BANAT NEWS)