Davide, Sim K ug Luigi mi-file na sa ilang CoCs

CEBU, Philippines - Si Liberal Party gubernatorial candidate Hilario “Junjun” Davide III maoy nag-una nga miduso sa kandidatura pagbukas sa filing sa certificate of candidacy diha sa provincial Commission on Elections Office (Comelec) kagahapong adlawa.

Matud ni Provincial Comelec Supervisor Atty. Lionel Marco Castillano pagbukas sa ilang buhatan alas 8:00 sa buntag kagahapon mipatin-aw dayon si Davide aron pagduso sa kandidatura niini.

Walay mga supporters ingon man kauban sa partido nga kuyog si Davide gawas lang sa iyang asawa, inahan ug ang iyang amahan nga si kanhi Chief Justice Hilario Davide Jr.

Paglabay sa 30-minutos sunod nga miduso sa iyang COC si kanhi kongresista Simeon “Sim-K” Kintanar nga subling magpapili pagka kongresista sa 2nd district.

Pagka alas 10:00 sa buntag ang anak ni anhing vice Governor Gregorio Sanchez nga si Engr. Grezilda “Gigi” Sanchez Zaballero misang-at sab sa iyang kandidatura pagka board member sa 3rd district.

Samtang sa pagka alas 11:10 sa dayon nang udto si 6th district congressman Luigi Quisumbing misang-at usab sa iyang kandidatura pagpapili og balik pagka kongresista sa maong distrito. Si Kintanar lang ang independente nga niduso og kandidatura kagahapon.   (Darrel A. Carumba/EIM) (BANAT NEWS)