CEBU, Philippines - Usa ka barangay kagawad ang nadakpan sa sakop sa Provincial Anti-Illegal Drugs Special Operation Task Group (PAIDSOTG) sa gipahigayong buy-bust operation sa Sabado sa buntag sa Barangay Poblacion, Balamban.
Usa ka bulto ug laing usa ka gamay nga pakete nga gidudahang shabu ang sulod nga mokantidad og P30,000 ang nakuha sa operatiba gikan kang Jaime Manolong Fetiluna, minyo ug taga-Barangay Jumangpas.
Gawas sa shabu, ang P500 marked money, cellular phone ug pitaka sa suspek na-recover usab sa operatiba.
Si Fetiluna gidakop human gikatahong mitunol sa usa ka gamay nga pakete sa shabu bugti sa P500 cash gikan sa poseur buyer.
Si SPO1 Francis Alen Villamor, sa PAIDSOTG, mibutyag nga bag-o pa lang si Fetiluna sa maong negosyo.
Sa laing operasyon, balor P400,000 nga shabu ang nakuha sa operatiba sa Philippine Drug Enforcement Agency (PDEA)-7 sa gipahigayong buy-bust operation niadtong Sabado sa udto sa Barangay North Poblacion, San Fernando.
Ang target sa maong operasyon mao si Jovino Rendal, 49, samtang ang tulo niini ka mga kaubanan nga sila si Dennis Cantiveros, 41; Arnelio Rendal, 45; ug Mario Bunghanoy, 35, apil usab nga nasikop gawas sa balay ni Jovino.
Nakuha gikan kang Jovino mao ang 11 ka bulto sa shabu ug laing 10 ka tag-as nga pakete ang nakuha gikan kang Cantiveros, duha ka laing tag-as nga pakete gikan kang Arnelio ug usa ka medium nga pakete gikan ni Bunghanoy.
Si Jovino nakuhaan og dugang 11 ka bulto samtang si Cantiveros nakuhaan og laing10 ka gagmay’ng pakete nga pulos dunay sulod nga gidudahang shabu.
Lakip sa nakuha ang P1,000 marked money ug P1000.50 nga gituohang halin sa grupo.
Si Jessie Tabanao, spokesperson sa PDEA-7, mibutyag nga sa miaging buwan pa nila nadawat ang taho mahitungod sa pagpamaligya og shabu ni Jovino. (BANAT NEWS)