SEPTIYEMBRE 30, 2012

Air-cooled engine

1882—Gipakatawo ang imbentor sa labing unang makina sa abyon nga air cool o ang dili na pagbubo og tubig aron mapabugnaw ang makina sama sa mga sayong naimbentong mga makina sa eroplano. Si Charles Lawrance nga usa ka Amerkanong aeronautical engineer maoy midesinyo sa labing una ug malampusong makina nga gigamit sa mga makasaysayong flights sa natad sa abyon. Tungod sa iyang imbensyon   nawala na ang imposibleng long-distance flights sama sa unang trans-atlantic flights ug trans-continental flights nga nahimo nila ni Admiral Byrd, Charles Lindbergh, Amelia Earhart ug Clarence Chamberlain.

USS Nautilus

1954—Niining petsaha nagsugod ang dakong kausaban sa natad sa teknolohiya sa panggubatan gamit ang submarine dihang gi-komisyon ang labing unang nuclear powered submarine ang USS Nautilus sa Groton, Connecticut sa USA, kini maoy unang nakasuong sa ilawom sa Arctic ice ug mitabok sa North Pole sa Arctic Ocean niadtong 1958 nga walay tubiltubil og fuel. Human madiskubrehi ang paggamit og nuclear reactors hulip sa mga diesel engines sa submarino mas dugay nga makasawom sa dagat ang maong mga barko ug mas lisod silang pangitaon sa ilang mga kaaway. Kaniadto kinahanglang mogawas sa dagat ang submarino ug ang diesel engine maoy magpadagan aron usab i-recharge ang mga baterya niini nga maoy gamiton pagpadagan sa propellers ini og salom sa dagat, apan samtang nag-charge sa ibabaw sa dagat mogimaw ang submarino ug daling makita sa kaaway. Kinahanglan usab nga motubil og krudo alang sa makina samtang ang nuclear reactors taas na ang tulo ka tuig una kini ilisan og fuel rods.