Kaluwasan sa mga biyahedor gibantayan

CEBU, Philippines - Ang     mga ahensya   sa maritima sa Central Visayas nagkauyon sa pagtinabangay sa pag-umol og mga panukdanan alang sa pagpalig-on sa kaluwasan sa mga dungguanan ug usab pagsiguro sa   kinabuhi sa mga pasahero nga mobiyahe sa sulod o gawas sa rehiyon.

Atol sa   usa ka press conference   nga gipahigayon didto sa buhatan sa Philippine Coast Guard (PCG) 7, ang mga opisyales gikan sa PCG 7, Maritime Industry Authority (Marina-7), Cebu Port Authority (CPA) ug Philippine Port Authority (PPA-7) mitaho sa ilang nagkalain-laing pamaagi nga ilang gisagop sa tagsa-tagsa nila ka opisina kalabot sa pagsiguro nga luwas ug adunay seguridad ang mga dapit nga dunggoanan   sa mga barko    dinhi sa     rehiyon.

Gawas niini gisiguro usab nila ang katagbawan sa pagsakay ug sa biyahe sa liboan ka mga pasahero nga modunggo sa nagkadaiyang pantalan sa Central Visayas.

Matud pa ni PCG-7 Commander Commodore William Melad nga ang ilang ahensya naningkamot gayud   kutob sa mahimo   aron masiguro nga luwas kanunay ang mga pasahero nga malinawong modunggo sa mga pantalan kay usa kini sa ilang nag-unang responsibilidad ilabi na sa panahon nga adunay  bagyo.

Dugang pa niya nga lakip usab sa ilang panukdanan sa seguridad mao ang pagpahigayon og inspeksyon sa mga sakayan sa dili pa kini tugotan nga mobiyahe uban sa pag- eksamin sa   kapasidad sa barko , kauban na ang pagsuta sa gibug-aton sa kargamento ug ang gidaghanon sa pasahero.

Samtang si Maritime Industry Development Specialist Suzette Sobrino sa Marina 7 mipadayag usab sa iyang dakong suporta   pinaagi sa paggahin sa ilang kusog sa pag-implementar og tukmang panukdanan sa pagsiguro sa kaluwasan sa mga pasahero sa   mga sakyanan sa kadagatan.

Gipahayag ni Sobrino nga moluwat sila og certificate of proficiency sa mga sakyanan sa kadagatan   nga wala’y depekto ug usab sa pagdasig sa ilang pagbansay-bansay alang sa seafarers sa  mga tripolante sa barko .

Hinuon sa pagkakaron miimplementar sila og kausaban sa ilang pagbansay-bansay ilabi na sa pagkuha og lisensya   busa ilang girekomendar nga matag usa kinahanglang mokuha og seafarer identification card.

Si CPA Director   Oscar Lopez sa Port Security Safety and Environmental Management Department mitataw   usab nga sa ilang bahin ilang gihatagan og pagpakabana ang paglikay og bisan unsang mga insidente alang sa hapsay nga biyahe sa mga pasahero sa mga sakyanan sa kadagatan. 

Iyang gibutyag nga   usa usab sila sa kanunay nga naniid sa kahimtang sa mga barko ug sa mga pantalan aron matuman sa hingpit ang Standard Operating Procedure (SOP)   sa biyahe sa kadagatan diin luwas ang tanang pasahero gikan sa puwerto nga gigikanan hangtud sa puwerto nga dunggoan niini ug bisan hangtod ngadto sa terminal sa mga sakyanan sa yuta.  

 Gibutyag usab ni PPA-7 Technical Assistant to the Port District Manager Edna Blanco nga ilang gipalig-on ang mga panginahanglan   sa mga sakayan, mga operator ug ang   mga shipping company sa dili pa   mobiyahe sa kadagatan ang ilang sakyanan.

Gitugon usab ni Melad ang publiko, mga magpapatigayon ug mga nagpakabanang ahensya sa goberno sa pagbuhat usab sa ilang bahin tungod kay matud pa niya ang kaluwasan sa kadagatan maoy gikabalak-an sa tanan. (-correspondent/WC)  (BANAT NEWS)