Proyekto ni Eddiegul suportado sa negosyante

CEBU, Philippines - Ang Cebu Business Club uban sa 14 ka mga business chamber   naghiusa   nga misuporta sa proyekto sa road widening ni Kongresista Eduardo Gullas sa unang distrito sa lalawigan sa Sugbo ug uban pang infrastraktura sa ubang bahin sa lalawigan

Sa milabay’ng adlaw nalakbit sa kongresista ang pagpahibawo kabahin sa suporta sa CBC sa iyang proyekto sa pagpalapad ug pagpasemento sa karsada gikan sa lungsod sa Minglanilla-Naga ug Naga-Carcar.

Ang 14 ka mga business chamber mao ang Cebu Business Club, Cebu Leads Foundation, Inc., Cebu Chamber of Commerce & Industry, Mandaue Chamber of Commerce & Industry, Mactan Island Chamber of Com. & Ind., Filipino-Chinese Chamber of Com. & Ind., American Chamber of Commerce, European Chamber of Commerce, Canadian Chamber of Commerce, Hotel Resort & Restaurant Asso. Of Cebu, Cebu Real Estate & Builders’ Association, Step Up Young Enterpreneurs ug Bosconian Int’l Chamber of Commerce.

Ang presidente sa CBC nga si Gordon Alan P. Joseph sa suwat niini mipahibawo ngadto sa kongresista nga uban sa 14 ka mga business chamber   miila sila sa mga critical road infrastructure project aron maapil sa 2013 budget kay gikinahanglan kaayo nga mapauswag   kini alang sa kalamboan sa Sugbo.

Ang pagpalapad ug pagpasemento sa karsada sa Minglanilla-Naga ug Naga-Carcar ug ang diversion road sa Carcar Rotunda Heritage Area lakip sa gisuportahan sa grupo.

Si Joseph    mi-awhag sa kongresista nga i-endurso ngadto kang Secretary Rogelio Singson sa Department of Public Works and Highways (DPWH) ang mga proyektong ilang gisuportahan nga mahimong prayoridad sa national level.

Ang ubang proyekto nga gisuportahan sa sektor sa patigayon mao ang pagpalapad ug pagpasemento sa karsada sa dalan M. Velez duol sa Kapitolyo, dakbayan sa Sugbo, pagpauswag sa duha ka junction sa Parklane ug Tesda area, pagpalapad sa karsada sa N. Bacalso Avenue ug ang pagpalapad ug pagsemento sa Banilad Talamban Road. Ang grupo misuporta usab sa ubang proyekto sa   mga dakbayan sa Mandaue ug Lapu-Lapu.

Si Joseph midugang nga nagtuo sila nga ang pagpauswag sa mga inprastraktura nga ilang gisuportahan makapalambo sa Sugbo tungod kay makapaagni kini og dugang mga turista ug investor.

(/WC)(BANAT NEWS)