Kapitolyo mihinabang sa mga polis ug drayber nga naaksidente

CEBU, Philippines - Dali kaayong mihimo og lakang si Gobernador Gwendolyn Garcia     sa pagtabang   sa mga pamilya sa   nakalas nga duha ka mga polis ug   sa sibilyan nga   drayber nga nagmaneho sa patrol jeep sa kapolisan dihang natagak sila sa pangpang sa sitio Mag-alambak, barangay Mantalongon, sa lungsod sa Dalaguete   niadtong Huwebes sa kaadlawon.

Sa dihang nahinabi sa mga tigbalita   ang gobernador miingon nga iya dayun nga gimandoan ang Provincial Social Welfare and Development Office pagpadangat sa dinalian nga tabang ngadto sa hingtungdan. Gawas kanila ni SPO1 Jose Geno Ursonal, 40, ang team leader ug PO3 Christopher Requina, 53, ug ang drayber nga si Frederick Caruana, 30 , ang usa ka polis nga si PO3 Allan Sanoy, 38, nga kauban nila sa sakyanan naangol ug anaa pa sa tambalanan.

Matud pa ni   Garcia nga giatiman na sa Kapitolyo ang mga galastohan ni Sanoy sa hospital samtang ang mga hinabang gitunol usab dayon ngadto sa mga pamilya sa mga polis ug driver nga namatay.

Masaligon   ang gobernador nga walay depekto ang patrol jeep nga gisakyan sa mga biktima   ug   usa gayud ka disgrasya ang nahitabo sama sa gikataho sa mga pamantalaan. Kini tungod kay maayo man ang pag-atiman sa mayor sa maong lungsod sa nahisgutang partol jeep nga gihatag sa kagamhanan sa lalawigan sa Sugbo.

Gitataw usab   sa gobernador nga ang lugar nga nahitaboan usa gayud ka    accident prone area. (/WC) (BANAT NEWS)