Gipusil sa ex-convict angol

CEBU, Philippines - Talandugon ang kahimtang sa 33 anyos nga construction worker human kini pusila sa usa ka ex-convict samtang naglakaw sa dalan didto sa barangay Lambusan lungsod sa San Remegio niadtong Biyernes sa alas 6:30 sa hapon.

Ang biktima mao si Norie Lambusan, 33, minyo, construction worker ug nagpuyo sa maong lugar.

Samtang ang suspek mao usab si Joven Capada, 25 , nga nagpuyo usab sa maong lugar, ex-convict ug aduna pay daghang kasong pending   sa korte. Si SPO1 Joejohnnisky Ynot, imbistigador sa San Remegio Police Station mibutyag sa  Banat News  nga ang biktima gisugo   sa pagkuha sa electric fan sa pikas balay nga gipuy-an sa iyang uyoan. Apan wala   madala niini ang electric fan   tungod kay walay tawo ang   maong pinuy-anan hinungdan nga mibalik dayon   kini apan samtang naglakaw sa dalan gisugat sa suspek ug dayon gipusil sa makadaghang higayon.

Ang biktima naigo sa bukobuko ug sa walang bahin sa paa ug daling gidala sa tambalanan dinhi sa dakbayan sa Sugbo. Wala pa ikabutyag sa biktima kun unsay atraso niya sa suspek tungod kay naglisud ang kahimtang niini sulod sa tambalanan.

Samtang ang suspek nakaeskapo human sa hitabo ug padayon karong gipangita sa kapolisan.  (BANAT NEWS)