CEBU, Philippines - Lima ka tawo ang nangaangol sa duha ka aksidente sa kadalanan diha sa duha ka lungsod sa habagatan.
Nakaangkon og grabeng kadaot sa iyang lawas ang usa ka trabahante sa usa ka pabrika sa semento sa dakbayan sa Naga human kini nadumbolan sa usa ka awto niadtong Biyernes sa gabii diha sa barangay Linao, lungsod sa Minglanilla.
Ang biktima giila sa mga polis nga si Michael Guder, 20-anyos, residente sa nahisgutang barangay kinsa gidala ngadto sa South General Hospital sa dakbayan sa Naga.
Ang drayber sa maong sakyanan nga si Bryan Manquiquis, nakaangkon usab kini og mga samad ug bun-og sa lawas human ang windshield sa iyang awto nabuak ug ang atop nalumping.
Si PO2 Avelino Selloria sa pakighinabi sa Banat News gikan nanaog sa usa ka pasaheroan si Guder ug maoy pag-overtake ni Manquiquis ug nadumbolan kini.
Ang biktima nilupad sa ibabaw ug nabanda sa sakyanan una pa nahagba diha sa karsada. Si Manquiquis naabtan sa mga polis diha sa driver seat nga nagmulo usab sa kasakit sa iyang lawas ilabi na sa iyang ulo.Ang duha daling gidala ngadto sa South General Hospital.Sa laing bahin, tulo ka tawo ang naangol sa panagsingkiay sa tulo ka motorsiklo diha sa national highway sa sitio Bia-ong, barangay Dakit, lungsod sa Barili niadtong Huwebes sa gabii.
Si SPO3 Elmer Opsima sa Barili Police Station sa pakighinabi sa Banat News mibutyag nga ang mga motorsiklo nga nalambigit mao ang Honda XLR 200cc nga gimaneho ni Brando Galon, kinsa dunay angkas nga si Jonne Melero, 25, taga sitio Tambisan, Mantalungon, Barili.
Ang sunod nga motorsiklo mao ang Honda XRM-125 nagtangag sa plakang 5157-GT gimaneho ni Charlie Caballero, 18, taga barangay San Juan, lungsod sa Aloguinsan ug ang ikatulong motorsiklo mao ang Suzuki Smash nga gimaneho ni Juriel Babao, 17-anyos, taga barangay Mantalungon, Barili.
Sa imbestigasyon sa kapolisan nag-una si Galon ug nagsunod ang duha nga daw naglumbaanay.
Apan pag-overtake ni Caballero kang Galon sa walang lane nalahos kini sa barbwire ug napasok.
Mihunong si Galon aron unta kini tabangan apan naigo siya sa nagsunod nga si Babao maong nangatumba sila ug ang angkas niini ug pulos gidala sa Barili District Hospital.
(/EIM) (BANAT NEWS)