CEBU, Philippines - Gitagalan lang sulod sa usa ka semana ang imbestigasyon sa kapulisan sa pagkahagbong sa patrol jeep sa kapulisan sa lungsod sa Dalaguete nga mikalas og tulo ka kinabuhi duha niini mga polis sa sitio Mag-alambak sa barangay Mantalongon niadtong miaging kaadlawon.
Matud ni Insp. Dexter Basiergo, hepe sa Dalaguete Police Station dihang nahinabi sa Banat News ang iyang chief investigator nga si Clito Pia maoy gitahasan nga mangulo sa imbestigasyon.
Si Basiergo miingon nga ang resulta sa imbestigasyon maoy magtubag sa daghang mga tanghaga sa maong trahedya nga gidudahang posibleng mechanical failure kay gubaon ang maong sakyanan, o ba kaha human error ug duna say report tungod sa engkanto.
Matud ni Basiergo ang resulta unya sa imbestigasyon iduso nila sa Cebu Police Provincial Office (CPPO) ug copy furnish sa National Police Commission ug ingon man ngadto ni Dalaguete Mayor Allan Cesante.
Nakagawas na sa tambalanan ang bugtong naangol nga si PO3 Allan Sanoy kinsa miduaw sa haya sa mga kaubang sila si PO3 Christopher Requina ug sa sibilyan nga drayber nga si Frederick Caruana nga gihaya sa miaging gabii sa police station.
Samtang si SPO1 Jose Geno Ursonal adto gihaya sa ilang balay subay sa hangyo sa mga kabanay apan giingong ibutang kini pipila ka minutos sa police station sa dayung lubong niini.
Matud pa ni Basiergo nakahatag na og pasiunang hinabang si Mayor Cesante kagahapong adlawa ngadto sa mga kabanay sa mga biktima.
Nagpaabot si Basiergo sa bag-ong duha ka polis nga ihulip sa namatay niyang sakop. Pagkakarun ang kapulisan sa Dalaguete duna na lay 20 ka personnel apil na ang hepe nga unta 22 ang tanan sa wala pa mamatay sa disgrasya sila si Requina ug Ursonal. (BANAT NEWS)