CEBU, Philippines - Dili tiaw ang gibating kasagmuyo ni Mantuyong Barangay Captain Antonino Maquilan sa nagpadayon nga pagpangsakmit sa ilang mga baboy nga inasal bisan na ang ilang giluto alang unta sa nagsaulog sa birthday nga lakip sa gisakmit sa mga sakop sa City Veterinarian sa dakbayan sa Mandaue.
Matud pa niya nga gihangyo pa nila ang mga sakop sa veterinarian nga dili lang dad-on kay giluto kadto alang sa nagsaulog sa birthday nga ilang silingan apan wala gyud sila paminawa hinungdan nga nagmantinil na lang og linutong dugo-dugo ang nagsaulog sa birthday nilang silingan. Giangkon ni Maquilan nga nagtinguha gyud unta sila sa pagkuha og permit sa ilang pag-ihaw og baboy nga ilang asalon apan dili man usab sila hatagan sa kagamhanan.
Dugang pa ni Maquilan nga dako ang ilang alkanse sa matag higayon nga sakmiton ang ilang mga giluto nga inasal kay dili na man mabalik ang ilang puhonan.
“Ang nakasakit pa gyud kay duna pay moingon nga pataudtauri pa na og gamay sa kayo aron maayo ang pagkaluto,” pamahayag pa ni Maquilan.
Si Dr. Daisy Penetrante nga maoy city veterinarian officer sa Mandaue dihang nahinabi sa Banat News miingon nga daghan nang higayon nga ilang gisakmit ang mga giluto nga inasal nga baboy nga ilang maaktohan sa sitio Asinan sa barangay Mantuyong sa maong dakbayan.
Gipasabot niya nga gisakmit kini tungod kay ilang nakita nga ilegal ang pag-ihaw sa baboy nga wala gyod mag-agi og inspection sa ilang mga meat inspectors sa dakbayan.
Dugang pa niya nga mailhan ang karne nga wala mag-agi sa pagsusi sa ilang meat inspectors tungod kay wala man kini tatak nga makita sa karne.
Si Penetrante mipasabot nga hinuon dili mausik ang ilang masakmit nga karne kun sa ilang pakisusi nga luwas kini alang sa pagkaon sa tawo adto kini nila ihatag sa mga binilanggo sa Mandaue City Jail o ba kaha sa buhatan sa Social Welfare sa dakbayan.
Matud pa niya nga andam na ang mga tangkal sa baboy sa ihawan sa barangay Labogon ug mahimo usab sila nga adto sa maong dapit magluto sa ilang inasal. (BANAT NEWS)