CEBU, Philippines - Duha ka mga lalaki ang nadakpan sa kapolisan sa gihimong buybust operation sa kapolisan diha sa sitio Plastican, Barangay Duljo-Fatima kagahapon sa kaadlawon nga miresulta sa pagkasakmit sa kapin 20 gramos nga gidudahang shabu ug armas.
Nadakpan sa kapolisan si Marwin “Mawi” Abelgas, 22, giingong level two drug pusher ug iyang sakop nga si Juvan Torres, 23, kinsa naaktuhang nag-repack og shabu atol sa pagronda.
Si Chief Insp. Romeo Santander,kinsa maoy nangulo sa maong operasyon miingon nga gibanabang 20 gramos nga dul-an P100,000 nga shabu ang ilang nasakmit.
Upat ka adlaw na ang milabay dihang nakadawat sila og impormayon gikan sa mga molupyo bahin sa walay kukahadlok nga pagpamaligya og shabu diha sa maong dapit.
Ang CIB operatives pinangulohan ni Santander inabagan sa City Anti-Illegal Drugs Special Operation Task Force Group (CAIDSOTFG) miadto sa balay ni Abelgas diin siya madakpi human motunol og usa ka paketeng may sulod nga gidudahang shabu sa poseur-buyer ug midawat sa buy-bust money.
Sa pagsiksik kang Abelgas nakuhaan kini og dugang 60 ka paketeng may sulod nga gituohang shabu, sumala pang Santander tag P400 ang matag pakete niini.
“Diretso sa iyang balay amo siyang gihamag then didto sa sulod, na-caught in the act namo ang usa ka-suspek (Torres) nag-repack sa shabu,” dugang pa ni Santander.
Dugang 96 medium packs nga duna gihapoy sulod nga gidudahang shabu ang nakuha sa kapolisan gikan kang Torres nga nagkantidad og P700 matag usa.
Lakip sa nakuha sa kapolisan ang P2,400 cash nga gituohang halin sa ginadiling drugas ug usa ka KG9 submachine pistol, usa ka kalibre .45 pistola ug mga magazines ug bala niini.
Sumala pang Santander makabaligya si Abelgas og 200 gramos nga shabu matag semana.
Samtang tulo ka mga lalaki usab ang nadakpan ug nakuhaan og ilegal nga drugas ug mga armas diha sa Tuburan ug Argao niadtong Huwebes.
Ang Criminal Investigation and Detection Group (CIDG)-7 pinangulohan ni Chief Insp. Germano Mallari misikop nila ni John Loyd Roquero, 33, ug Chiquito Cadano, 46, pulos taga Barangay Poblacion 2, sa Tuburan niadtong Huwebes sa kaadlawon.
Pinasikad sa search warrant tungod sa paghupot og armas gikan ni Judge Hermes Montero sa Regional Trial Court Branch 59 gironda ang balay ni Roquero ug nakuha ang usa ka .38 caliber revolver nga may mga bala ug drug paraphernalia. Samtang nakuhaan usab si Cadano og usa ka .38 caliber revolver nga may mga bala ug usa ka bala sa.9mm pistol, usa ka holster, magazine pouch, ug usa ka paketeng may sulod nga gidudahang shabu.
Matud pa nga ang duha gireklamo sa mga tawo tungod sa pagsige og dala og armas.
Sa laing operasyon nadakpan sa Argao police sa buy-bust operation diha sa public market sa Barangay Poblacion si Dennie ‘Ponkol” Lopez, 44, taga Barangay Langtad ug nakuhaan og walo ka paketeng may sulod nga gidudahang shabu, marked money nga P500; drug paraphernalia ug P250 nga gituohang halin niini. (BANAT NEWS)