Nagsunog sa kaugalingon kritikal

 CEBU, Philippines - Kritikal  ang kahimtang  sa  usa ka lalaki  human  magsunog sa kaugalingon sulod sa Magellan’s Cross tapad sa Basilica del Sto. Niño sa dakbayan  sa Sugbo pasado alas 7:00 sa buntag kagahapon.

Ang maong lalaki  kansang  ngalan wala pa hiilhi  gihulagway  nga nagpangidaron og 30 ngadto 40-anyos ug kasamtangan kini nga gitambalan sa Cebu City Medical Center  (CCMC) gumikan  sa  grabing paso sa iyang lawas. Si Marjorie Salbi, 36, nga tindera og  kandila sa simbahan, mibutyag nga iyang nakit-an ang biktima nga misulod sa Magellan’s Cross  nga nagbitbit  og botelya nga nagtuo  siyang  tubig  ang  sulod.

Midugang  siya  nga iya pa  kining nakit-an nga nag-ampo  apan nakurat na lang siya  dihang gibubo niini sa iyang  lawas  ang  sulod  sa botelya  nga gibitbit  niini ug didto pa niya hisayri  nga  gasolina diay ang sulod sa maong botelya kay nanimaho man.

Dihang basa na  kaayo  ang  lawas  niini giingong nangadye na usab kini ug mipasiga  dayon sa iyang lighter kansang kayo dali kaayong nakapasilaob sa lawas  niini.

Apan bisan kun nagkayo  na  ang  lawas  niini, wala gayud  kini motiyabaw sa kasakit.

Maayo na lang kay may  isog kaayong  babaye nga  mihubo  sa iyang jacket ug  dayon  maoy  gilapdos  ngadto  sa lawas sa biktima aron  pagpaslok  sa kayo  hangtud  nga  miligid kini  sa semento. Unya ang usa ka security guard sa maong  dapit maoy  mikuha  og   fire extinguisher   ug   gipasiritan niini ang  lawas  sa biktima   dayon  gidala  ngadto  sa CCMC.

Didto  nasayran  nga  gikan  sa ulo hangtod  sa tiil nabulit  sa mga paso ang biktima.

Nasuta  usab sa usa ka kawani sa hospital nga may nakuha silang resibo sa  gibayrang  gasolina  sa  biktima  nga gituohan nilang maoy gigamit sa pagdaob sa kaugalingon  niini.

Ang kapolisan mibutyag   nga sa pagsuwat ning balita wala pay bisan usa nga kaliwat o pamilya ang miduaw sa  biktima didto sa tambalanan.  (BANAT NEWS)