Mga titser makaangkon na og Luna

CEBU, Philippines - Hingpit nang makaangkon og luna ang mga magtutudlo gikan sa napalit sa ilang asosasyon nga luna sa kagamhanan sa lalawigan sa Sugbo nga nahimutang sa Nivel Hills siyudad sa Sugbo.

Kini human nga gilagdaan ni Gov. Gwendolyn Garcia ang Deed of Absolute Sale uban ni Dr. Oscar Romanillos ang presidente sa Cebu Public School Teachers Association (CPSTA) niadtong adlaw nga Martes.

Lakip sa mipirma sa nahisgutang deed of absolute sale mao ang legal officer sa lalawigan sa Sugbo Atty. Marino Martinquilla ug ang abogado usab sa CPSTA nga si Atty. Allan Malisaysay ug uban pa.

Sumala pa ni Martinquilla nga kadtong mga sakop sa CPSTA makahimo nang makaangkon sa hingpit sa luna sa probinsiya sa higayon nga mahuman niini ang pagbayad sa 100 metros nga luna nga gitagana ngadto sa matag usa sa mga sakop niini.

Si Garcia nalipay nga nahingpit ang maong transaksyon human sa taas nga negosasyon ug ang hingpit nga pagtugot sa mga sakop sa Hunta Probinsyal. (BANAT NEWS)