Hinabang sa PWDs gihimong P3 mil

CEBU, Philippines - Ang konseho sa siyudad sa Sugbo mipasar kagahapon sa resolusyon ni Konsehal Alvin Dizon nga pagpausbaw og P1,000 gidawat nga financial assistance sa mga persons with disability (PWDs).

Busa makadawat na og P3,000 ang mga PWD matag tuig gikan sa orihinal niini nga P2,000. Ang siyudad sa Sugbo adunay kapin sa 2,000 ka mga PWDs nga narehistro ug adunay kapin sa usa ka libo karon nga   mga bag-ong aplikante.

Sumala pa ni Japson nga dili igo ang P2,000 nga financial aid sa mga panginahanglonon sa mga PWDs busa gidungagan kini og P1,000.

Ang pundo niini nagikan sa P21 milyones nga pundo alang sa financial assistance sa PWDs karong tuiga.

Mihangyo usab ang konseho sa executive department nga moduso og supplemental budget aron magahinan og financial aid ang mga bag-ong aplikante.

Matud pa sa konsehal nga dako na kaayo og tabang ang maong kantidad ilabi na kadtong mga PWD nga nagmentinar og tambal.

Sa laing bahin, padayon karon ang pag-awhag sa konseho sa Department of Health (DOH) ug Bureau of Food and Drugs (BFAD) sa estrikto nga pag-monitor sa mga botika, klinika ug uban pa nga establisamento nga namaligya og tambal.

Una na nga gipadayag ni Konsehal Alvin Dizon nga kinahanglan nga motuman gyud ang mga nagdumala og botika sa mandato nga 20% nga diskuwento sa mga PWD  sa higayon nga mamalit sila og tambal.

Katungod sa mga PWD nga makabaton og diskuwento base sa Republic Act 9442 o gitawag nga “Magna Carta For Disabled Persons.” (/EIM)(BANAT NEWS)