Ekonomiya sa CV paspas ang pagtubo

CEBU, Philippines - Nalantawan sa Regional Development Council (RDC) 7 nga   magpadayon ang pagsaka sa economic growth rate sa Central Visayas   gikan karon   hangtod sa tuig       2016.

Sumala pa ni Assistant Regional Director Efren B. Carreon sa National Economic Development Authority (NEDA) 7 atol sa Association of Government Information Officers (AGIO) forum kagahapon didto sa buhatan sa NEDA 7 nga sa pagkakaron misaka na sa 7.9 porsento ang ekonomiya sa Central Visayas. Usa kini sa hinungdan nga nag-una ang Central Visayas   sa mga rehiyon sa Kabisay-an ug Mindanao nga nagbaton sa paspas nga pagsaka sa dagan sa   iyang ekonomiya, sumala pa ni Carreon.

Base sa gipresentar ni Carreon nga powerpoint, nasuta nga tanang sector   nga maoy nagpaandar sa ekonomiya sa nasud, nag-una ang    services sector   nga gilangkoban   sa transportasyon, komunikasyon   ug nagkalainlaing serbisyo para sa ekonomikanhong kaugmaran.

Gibutyag usab ni Carreon nga ang   ilang gi-target karon   mao ang pagpalambo sa mga international airport tungod kay ang Central Visayas   maoy nag-una karon   nga destinasyon   sa mga turista   nga local ug international. Labi pa gyud kining molambo kun kasugdan na sa pagtukod ang Panglao International Airport   karong 2013 nga gigahinan og P7.4 B.

Gisuta ni Carreon nga gusto sa RDC7 nga ang mga kaugmaran dili lamang mapunting dinhi sa dakbayan sa Sugbo, kundi sa laing tulo usab ka lalawigan sa Central Visayas nga naglakip sa Bohol, Negros Oriental ug Siquijor.  (BANAT NEWS)