Gumikan sa lalis, bana naghikog

CEBU, Philippines - Gumikan sa lalis tali sa asawa, nagpakamatay ang usa bana pinaagi sa pagbitay   sulod sa lawak niini sa ilang balay sa barangay Tangke Uno , siyudad sa Naga   sa miaging hapon.

Ang naghikog   mao si Casimero Labang, 59 , minyo , nga nagpuyo sa maong lugar.

Si PO1 Cleofas Cabrera sa Naga City Police Station mibutyag sa Banat News nga ang unang nakakita kang Labang nga nagbitay nga wala nay kinabuhi mao ang iyang dalagitang apo nga si Rea Cabatuan, 12.

Nakurat ang dalagita  sa iyang nasaksihan ug nasuta nga ang pikas tumoy sa pisi maoy gihikot sa liog niini samtang ang pikas tumoy didto usab igaid sa sagbayan sa ilang balay.

Sa pagtuo nga malibre pa, gisuwayan sa tagtungod paghatod si Labang ngadto sa Minglanilla District Hospital apan gideklarar kini nga dead on arrival (DOA) didto.

Subay sa imbistigasyon sa kapolisan nasuta nga sa wala pa ang hitabo nagkalalis   si Labang ug   iyang asawa nga si Josefa Labang, hingkod.

Apan malagmit naglikay   nga labing mosilaob ang kagubot, milakaw kini ug wala hisayri sa pamilya ang gipadulngan niini.

Gituohan nga   gumikan sa kahiubos niini ug nangluod, maoy hinungdan sa   iyang paghikog. Nasayran usab sa kapolisan nga ikatulo na  ang maong higayon sa mga hulga ni Labang nga maghikog.

Ang duha niya ka pagsuway og hikog sa milabay’ng mga buwan wala mahinayon kay nabantayan kini sa mga kabanay busa napakgang.  (BANAT NEWS)