CEBU, Philippines - Naligo sa samad pinusilan ang tibuok kalawasan sa 43- anyos nga sakop sa Tau Gamma Phi fraternity dihang girapido sa nagmotor nga lalaki ang pundok sa biktima nga nag-inom sa gawas sa tindahan daplin sa dalan sa barangay Cansaga sa lungsod sa Consolacion kagahapon sa ala 1:20 sa kaadlawon.
Ang biktima nga patay nang nadangat sa tambalanan mao si Gabriel Joshua Jumao-as, 43, nagpuyo sa V.G. Subdivision sa barangay Nangka sa Consolacion samtang padayon pang giila sa kapolisan ang mga mamumuno.
Matud ni PO2 Roosevelt Matuog sa Consolacion Police dihang nahinabi sa Banat News milabay ang pipila ka gutlo dihang naabot ang tulo ka lalaking sakay sa motorsiklo. Ang angkas niini minaog dayong pusil kang Jumao-as sa makadaghang higayon.
Sa wala pa ang hitabo si Jumao-as nag-inom sa iyang mga kauban dihang niabot iyang silingan nga si Anthony Tejero, 27, nga giingong dili na aktibong miyembro sa Alpha Kappa Rho fraternity nga kaniadto higpit nga karibal sa grupo sa biktima.
Apan ang duha ka fraternity nagkasabot nga hunongon ang ilang panagbangi ug nagtinabangay na sa nagkadaiyang proyekto alang sa komunidad.
Ang mga kauban sa biktima pulos naratol ug nag-iyahay og panagan pahilayo dayung tago aron dili maapil. Matud pa nga gitiwasan pa gyud sa mamumuno ang biktima bisan nahagba na kini dayong balik sa iyang motorsiklo ug mipadagan paingon sa direksyon sa siyudad sa Mandaue.
Ang biktima nakaangkon og tulo ka samad pinusilan sa dughan, duha ka pinusilan sa tiyan, duha pud ka pinusilan sa tuong kamot ug laing duha ka pinusilan sa bukobuko, patay na kini pag-abot sa Eversely Hospital sa Jagobiao siyudad sa Mandaue.
Si PO2 Jhonaskie Romero, usa sa responding officer, mibutyag nga ang drayber sa motorsiklo giingong mibunot usab og armas aron sa paghadlok sa posibleng mutabang kang Jumao-as.
“Hasta gani kuno ang usa ka sakay nibunot pud kuno og armas,” matud ni Romero. Walo ka kabhang sa .45 caliber ang na-recover sa kapulisan.
Ang pamilya ni Jumao-as giingong nagduda kang Tejero nga maoy hinungdan sa pagpamusil apan hugtanong gihimakak ni Tejero nga may kalambigitan sa maong hitabo. (BANAT NEWS)