Karambola sa 4 sakyanan 1 patay

CEBU, Philippines - Patay ang usa ka 19-anyos nga dalaga human maligsi og sakyanan ug naangol usab ang duha ka traysikol drayber nga nag-parking daplin sa dalan sa karambola sa mga sakyanan sa barangay Lipata lungsod sa Minglanilla niadtong Lunes sa kaadlawon.

Patay ang usa ka 19-anyos nga dalaga human maligsi og sakyanan ug naangol usab ang duha ka traysikol drayber nga nag-parking daplin sa dalan sa karambola sa mga sakyanan sa barangay Lipata lungsod sa Minglanilla niadtong Lunes sa kaadlawon.

Ang biktima nga patay nang nadangat sa tambalanan mao ang nagmaneho sa motorsiklo nga si Pierle Parba,19, molupyo sa barangay Dumlog sa siyudad sa Talisay.

Samtang ang laing duha ka biktima mao sila si Josephus Solis, 30, taga Lipata ug Jose Jinky Cabrillos, 43, taga Tungkil, Minglanilla pulos mga drayber sa traysikol.

Ang sakyanan nga midaro kanila mao ang Isuzu Bighorn nga gimaneho ni Manuel Ramos, 50, kagawad sa barangay South Poblacion sa lungsod sa San Fernando.

Samtang ang laing sakyanan nga nalambigit sa karambola mao ang Toyota Vios nga gimaneho ni Shella Rosales, 29, nagpuyo sa Villa Selina Subdivision barangay Tongkil, Minglanilla.

Matud ni PO2 Nikki Carlo Plarisan sa Minglanilla Police Station dihang nahinabi sa Banat News subay sa imbestigasyon ang Toyota Vios gikan sa siyudad sa Sugbo ug paingong mopauli sa maong lugar.

Giingong padulong untang moliko sa wala si Rosales dihang kalit nga nadasmagan sa nakalas nga dalaga nga nagmaneho og motorsiklo ang luyong bahin sa Toyota Vios.

Tungod sa kakusog sa pagbangga nalabay si Parba buwag sa motor ingon man ang iyang angkas nga si Johndi Geno,17, nga taga Pangdan, siyudad sa Naga.

Naatol nga maoy pag-agi sa lugar sa Isuzu Bighorn nga gikan sa siyudad sa Sugbo paingon sa lungsod sa San Fernando ug dihang nakita niya nga diha sa atubangan nalabay si Geno iyaha kining gilihayan paingon sa tunga nga bahin sa karsada.

Apan adto siya mipaingon diin motugpa si Parba ug naligsan hinuon kini ug nalahos ang Bighorn sa Toyota Vios ug tungod sa kakusog sa pagsampak mibaliwliw ang maong awto ug nahandos sa duha ka traysikol nga nagpaabot og pasahero.

Maayong pagkaangol sa duha ka drayber sa traysikol nga nangalabay usab ug gipanghatud dayun apil ang 19-anyos nga biktima sa Minglanilla District Hospital apan ang 19-anyos nga dalaga gideklarar nga dead on arrival apan luwas na sa peligro ang duha ka drayber sa traysikol.

Ang kagawad boluntaryong mitahan sa kapulisan apan gibuhian kagahapon human nagkasinabot sa kabanay sa mga biktima ug mipasalig pag-abaga sa tanang gastohan bugti sa dili pagpasaka og kaso. (/EIM)  (BANAT NEWS)