CEBU, Philippines - Lima ang naangol lakip na ang tag-iya sa nalimbuwad nga trak de karga didto sa bukirang bahin sa barangay Mojon, lungsod sa Sogod niadtong Domingo sa hapon.
Ang mga naangol mao ang tag-iya sa trak de karga nga si Engr. Juanito Gerona, hingkod, nga taga siyudad sa Mandaue ug mga pasahero nga sila si Susana Sembrano, hingkod, taga Holy Family Mandaue City, Edgardo Arances, hingkod, taga siyudad sa Sugbo, Josephine Catibig, 46, nga taga Tawason, Mandaue City ug Angeles Coronado, 56 , nga taga Binaliw siyudad sa Sugbo.
Si PO3 Julius Banguardia sa Sogod Police Station mibutyag sa Banat News nga ang maong sakyanan gikan sa lungsod sa Tabuelan paingon na untang mopauli sa siyudad sa Mandaue.
Apan pag-abot sa kurbada ug dulhogon nga karsada sa maong lugar may gikasugat kini hinungdan nga milihay kini apan gumikan sa kakusog sa dagan mitalipsay kini ug wala na makontrolar sa driver nga si Teodoro Lito, 56, nga taga Cabadiangan, lungsod sa Compostela, hinungdan sa pagkalimbuwad niini.
Sila si Catibig ug Coronado nasalibay, samtang si Sembrano ug Arances natabunan sa trak. Ang mga biktima daling gihatud ngadto sa Juan Dosado Hospital sa barangay Damolog apan gibalhin kini sa tambalanan sa dakbayan sa Sugbo.(Darrel A. Carumba/WC) (BANATNEWS)