Alay lakad sa Septiyembre 30

CEBU, Philippines - Agi’g pagtamud sa tinuig nga kasaulogan sa Alay Lakad Cebu Foundation Inc., usa ka Alay Lakad Walk for a Cause gitakdang ipahigayon karong umaabot Septiyembre 30 ning tuiga isip selebrasyon sa Alay Lakad Month nga gideklarar sa konseho sa syudad sa Sugbo.

Matud pa ni Alay Lakad Cebu Executive Chairman Steve Norman Tan nga nahinabi sa Banat News nga ang maong pundasyon nanginahanglan gayud pag-ayo og dugang pundo nga maoy gamiton aron isuporta sa nagpadayon niining programa nga naglangkob sa high school educational assistance, college scholarship ug usab skills and livelihood project training.

Dugang pa niya nga pinaagi sa mga donasyon nga ihatag sa mga indibidwal ug magpapatigayon nga adunay malumong kasing-kasing, dugang benepisyaryo pa unya ang posibleng katabangan niini. Gibutyag ni Tan nga daghan na gayud ang natabangan niining maong pundasyon ug kasagaran   kanila nagagikan sa mga kabus nga pamilya kinsa wala’y ikasarang sa pagbayad sa mga balayronon sa tunghaan sa ilang mga anak nga gustong motungha.

Gawas sa paghatag og pinansyal nga suporta, nahimong paagi usab sa maong pundasyon ang pagsilbi sa mga benepisyaryo kung nag-atubang kini og dagkong problema. Gani adunay usa ka benepisyaryo niini nga adunay kriminal record apan gitabangan kini sa pundasyon hinungdan nga nakalampos gayud sa iyang pagtungha.

Gipanghinaut ni Tan nga unta ang mga nagkadaiyang tunghaan, organisasyon, civic groups, ahensya sa gobiyerno, mga magpapatigayon ug lakip na ang publiko musalmot sa umaabot nga Alay Lakad Walk for a Cause   nga manukad sa City Central School hangtod sa Fuente Osmeña nga maoy Assembly Area sa alas 5:00 sa buntag. Ang pagpanglakaw magsugod gilayon sa alas 6:00 sa buntag padulong ngadto sa Plaza Sugbo sa Cebu City hall diin   ipahigayon ang programa. (/WC) (BANAT NEWS)