CEBU, Philippines - Gidakop sa kapolisan ang hubog nga kanhi konsehal sa lungsod human kini magwara- wara sa iyang armas nga wala’y lisensiya nga nakapalisang sa katawhan didto sa barangay Cogon sa lungsod sa Compostela niadtong Domingo sa alas 5:00 sa hapon.
Ang nagtingkagol na karon sa karsel mao si Artemio Cabatingan Luna, 50, minyo ug kanhi konsehal sa maong lungsod.
Usa ka kalibre .357 nga aduna pay upat ka buhing bala ug duha ka kabhang sulod sa cylinder niini ang nasakmit sa kapolisan gikan sa suspetsado
Si PO2 Arnie Goc-ong, imbistigador sa Compostela Police Station mibutyag sa Banat News nga ang mga molupyo sa maong lugar maoy mitawag sa ilang buhatan alas 4:40 sa hapon ug mipahibawo sa kagubot nga nahitabo sa ilang lugar gumikan sa gibuhat sa suspetsado. Pag-abot sa mirespondi nga mga polis ilang naabtan si Luna nga nagkupot sa armas niini hinungdan nga gisita dayon kini sa mga polis , gisakmit ang armas niini, ug dayon giposasan.
Apan milugnot kini ug misuway og sukol sa polis busa nasumbagan kini ni PO2 Emil Rubella sa nawong.
Gumikan sa kakusgan ug kakusog mohiwasa, gitabangan kini og layog sa mga polis ug dihang naposasan, gidala dayon nila sa ilang buhatan ug gibalhug sa karsel. Kagahapon sa hapon gitakda ang pagsang-at sa kasong illegal possession of firearm batok sa kanhi konsehal.
Napamatud-an usab sa gipahigayong liquor test nga positibo sa ilimnong makahubog ang kanhi konsehal. (/WC) (BANAT NEWS)