DOJ mialagad libre sa taga Consolacion

CEBU, Philippines - Ang Department of Justice (DOJ)   pinaagi sa Office of the Provincial Prosecutor (OPP) sa Sugbo   milusad og outreach program didto sa SM Consolacion nga naglakip sa mga serbisyong legal sa mga molupyo sa maong lungsod.

Kini may labot sa ika-115 ka tuig nga anibersaryo sa maong departamento   sa pag-alagad sa katawhang Pilipinhon   ug miabag lamang usab ang nagkalainlaing mga ahensya sa gobiyerno sa paghatud sa ilang mga serbisyo ngadto sa maong lungsod.

Ang maong pangalagad nga nagsugod sa alas 10:00 sa buntag hangtod sa alas 4:00 sa hapon niadtong Sabado (Sept. 22, 2012) giabagan   sa Bureau of Immigration and Deportation (BID), National Bureau of Investigation (NBI), the Integrated Bar of the Philippines-Cebu Chapter, the Cebu Lady Lawyers Association (CELLA), Southwestern University (SWU); University of San Jose Recoletos (USJR) Law School pinaagi sa Political Science Department niini.

Ang Department of Health (DOH-7) usab misuporta usab sa maong aktibidad pinaagi sa pagpalig-on sa kampanya niini bahin sa Anti-Rabies Law.

Ang mga libreng serbisyo nga gialagad sa maong mga ahensya naglangkob sa notarial services alang sa certificate of live birth ug mga affidavit, OPP-Cebu clearance, NBI clearance, information campaign kalabot sa Anti-Rabies Law, information campaign kalabot sa immigration law, ilegal nga pagpamutol og kahoy ug uban pang penal law. Samtang ang mga miyembro sa Integrated Bar of the Philippines-Cebu, CELLA, ug ang Young Lawyers Association of Cebu (YLAC) mohatag og serbisyo pinaagi sa legal clinic ug libreng konsultasyon ug ang SWU ug ang USJ-R mipahigayon og information drive. (BANAT NEWS)