CEBU, Philippines - Mikabat sa P9 mil ang nasakiyo sa tulisan nga mitulis sa usa ka pawnshop didto sa Poblacion, siyudad sa Danao kagahapon sa alas 12:00 sa udto.
Ang nabiktima mao ang Cebu Gold Pacific Pawnshop and Jewelry nga nahimutang sa Duterte St., sa Poblacion, Danao nga girepresentahan sa teller nga si Ruben Fernan, 24, ulitawo, nga nagpuyo ra usab sa maong lugar.
Samtang ang tulisan sa sinugdan nagpaila nga usa ka customer nag-antiyuhos ug nagkawo, nga may armas, ug nagsakay og motorsiklo.
Si SPO2 Ildefonso Prosia, desk officer sa Danao City Police Station mibutyag sa Banat News nga pagsulod sa maong tulisan sa pawnshop mideretso kini og duol sa teller dayong tion sa iyang armas de fuego ug mideklarar nga tulis.
Sa kahadlok sa biktima nga pusilon siya gitunol lang dayon niini ang kwarta sa iyang hunos nga mikantidad og P9 mil.
Human madawat ang kuwarta migawas dayon kini ug misakay sa iyang motorsiklo ug mipahilayo sa maong lugar.
Ang biktima igo nalang midangop sa buhatan sa kapolisan kinsa dihang misusi sa maong pawnshop nasuta nga wala kini security guard nga nagbantay. (BANAT NEWS)