CEBU, Philippines - Nanawagan ang mga Obispo kang Presidente Benigno Aquino III nga tahuron niini ang makahuloganong pakigbisog sa iyang mga ginikanan batok sa Martial Law.
Ang maong panawagan giatol sa ika-40 nga kasaulogan sa Martial Law niadtong Septiyembre 21, 2012.
Ang Visayas Clergy Discernment Group (VCDG) nagkanayon nga ang paghunong sa pagyatak sa tawhanong katungod sama sa militarisasyon, demolisyon ug pagpapahawa sa mga kabus sa dakbayan ug kabanikanhan, summary killing sa mga journalist ug mga environmentalist ug uban pang porma sa pagpangabuso sa tawhanong katungod angayang hatagan og dakong pagtagad sa presidente kay mao kini gipakigbisogan sa iyang mga ginikanan.
Gilakbit sa VCDG ang mensahe sa Santo Papa nga si Benedict XVI niadtong pagsaulog sa World Peace Day pagka-Enero 1, 2007 nga nagkanayon nga kadtong adunay mga politikanhon, teknikal ug ekonomikanhong gahum dili unta mogamit niini sa pagyatak sa tawhanong katungod sa mga hinikawan sa katilingban.
Dugang niini ang Santo Papa nagkanayon nga ang kalinaw nagsukad sa pagtahod sa katungod sa tanan.
Matud usab sa VCDG nga bisan pa sa pagdeklara sa presidente sa “daang matuwid” giingong nagpadayon gihapon ang paglapas sa tawhanong katungod tungod kay sulod sa duha ka tuig niyang paglingkod sa pamunoan adunay natala nga 99 ka extra judicial killings, 11 ka enforced disappearance, 60 ka frustrated extra-judicial killings, 222 illegal arrest nga walay detention, 216 ka illegal arrest nga dunay detention, 185 illegal search and seizure ug 7,008 forced eviction o demolisyon.
Ang VCDG nga ubos sa kagamhanang Aquino nasuta nga adunay 29,465 nga acts of forced evacuation, 19, 325 nga pagpanghulga, harassment ug intimidation, 6721 nga indiscriminate firings, 45 forced/fake surrender, 296 sa paggamit og sibilyan sa mga operasyon sa polis ug military.
Ang maong mga sibilyan giingong isip giya ug taming, 14, 620 paggamit sa eskwelahan, medical, religious ug uban pang mga lugar nga publiko alang sa katuyoang pangmilitar, 2,099 restriction o violent dispersal sa mass action, public assemblies ug uban pa.
Ang maong kasayoran gibase sa VCDG gikan sa Karapatan Quarterly Monitor, 2012.
Ang VCDG mipasangil nga dinhi sa Sugbo padayon ang mga demolisyon ug pagpahawa sa mga kabus nga kuminidad diin giingong kapin sa 30,000 ka mga bobong sa Metro Cebu ang nag-atubang sa demolisyon.
Gibutyag sa VCDG nga dunay mga mag-uuma kinsa giingong gipanghasi taliwala sa ilang pagpakigbisog alang sa tinuod nga reporma sa yuta ug ang maong mga mag-uuma midangop kang Arsobispo Jose Palma.
Ang mga mananagat usab sa Cordova, Cebu ug uban pang probinsiya ang giingong nahikawan sa ilang panginabuhian tungod sa reclamation projects alang sa pantalan, golf courses ug uban pa. (BANAT NEWS)