CEBU, Philippines - Nunot sa kalibog ug kawalay kasigurohan sa kampo sa Team Rama kung makakuha ba og suporta gikan sa Liberal Party nunot sa giingong paghatag na og certificate of nomination sa maong partido ngadto kang Kong. Tomas Osmeña aron maoy padaganon sa mayoralty race sa Cebu City, mas pilion nilang ideklarar nga “free zone” ang siyudad sa 2013 elections.
Gibutyag kini sa general campaign manager sa Team Rama nga si Konsehal Joey Daluz III kinsa mipadayag nga wala na siya kasabot sa nahitabo karon sa mga kadagkoan sa LP.
Sumala pa ni Daluz nga tataw nga wala kini motuman sa ilang politikanhong prinsipyo isip partido human ang LP mihatag og nominasyon kang Osmeña sa Bando Osmeña Pundok Kauswagan isip kandidato nila pagka-mayor sa dakbayan sa piniliay sunod tuig.
Samtang ang kampo ni incumbent Cebu City Mayor Michael Rama pabilin pang nagpaabot sa tubag sa LP kalabot sa ilang estado.
Sumala pa ni Daluz nga naglisod siya og sabot sa sitwasyon sanglit si Rama man unta ang incumbent mayor ug kanunay usab kini tigbayad sa monthly dues sa partido.
Nagmalaumon hinuon si Daluz nga mo-endorsar gihapon ang LP kang Rama ug andam usab siya modawat kung ma-free zone ang siyudad alang sa LP.
“Arang-arang na lang na kung free zone, kay makatabang man na sa kadaugan ni Mayor Rama,” sumala pa ni Daluz.
Samtang gibutyag ni Daluz nga dako kaayo nga asset sa Team Rama ang kandidato nila pagka-kongresista alang sa habagatang distrito nga si Atty. Aristotle Batuhan gumikan kay nakapanukad na kini sa nagkadaiyang barangay.
Ang Team Rama ug BOPK parehong nanikaysikay na sa nagkadaiyang pagpangandam sa pag-file nila sa ilang mga Certificates of Candidacies karong Oktubre 1-5. (BANAT NEWS)