Usa patay sa aksidente sa Mandaue

CEBU, Philippines - Patay ang usa tawo dihang gisungag ang motorsiklong iyang gisakyan sa naghaguros nga pribadong sakyanan sa dalan A.C. Cortes Avenue sa barangay Cambaro, dakbayan sa Mandaue alas-5 pasado ang takna niadtong Domingo sa buntag.

Namatay mao si Julian Wahing, taga dalan Arellano Blvd., dakbayan sa Sugbo samtang gitanggong sa kapolisan ang nagmaneho sakyanan nga gikasungag niini nga si Jose Victor Mendez, 27, taga Sacred Heart Village, barangay Gun-ob, dakbayan sa Lapulapu. Sa SPO1 Joel Catabas, imbestigador sa traffic division sa Mandaue City Police Office (MCPO) miingon nga gikan sa dakbayan sa Lapulapu ang biktima ug paingon sa flyover sa Maguikay samtang paingon usab si Mendez sa dakbayan sa Lapulapu.

Apan ang duha gikatahong nagkasungagay taliwala sa maong dalan ug tungod sa kakusog sa pagbangga nalamba si Wahing sa sementadong karsada nga bisan kun nagsul-ob og helmet grabeng kadaut sa ulo ug kalawasan gihapon ang iyang naangkon.

Si Catabas miingon nga gidala sa mga sakop sa Accident Control and Emergency Response Team (ACERT) ang biktima ngadto sa Mandaue City Hospital apan gideklarar kini sa mga doktor nga dead on arrival. Sa gihimong imbestigasyon ni Catabas giingong mikawat sa lane sa motorsiklo ang sakyanan ni Mendez.  (BANAT NEWS)