Daghan og patik gipatay

CEBU, Philippines - Nabulit sa samad pinusilan ang kalawasan ug ulo sa batan-ong lalaki nga naputos og patik ang lawas nga napalgang nagtinga pa sa libon nga lugar sa bukirang bahin sa sitio Pitogo, barangay Tubod lungsod sa Minglanilla niadtong Sabado sa alas 11:00 sa buntag.

Ang biktima gihulagway lang sa kapulisan nga 20 ngadto sa 25-anyos, 5’1 ang gitas-on, gamayon ug tabunon ang pamanit nga nagsuot og shorts nga kolor itom ug puti ug nagsapaw ang gisul-ob nga senina nga kolor tabunon ug violet. Sa pagsusi sa patay’ng lawas niini duna kini daghang patik sa kalawasan , usa niini sa walang bahin sa dughan nga may pangalang “Rommel Mendoza” ug sa tuong bahin sa dughan dunay patik nga “Rosemarie” ug sa ubos nga bahin sa bukobuko dunay patik nga “Jerome.”

Matud ni PO2 Vincent Alinabo sa Minglanilla Police Station dihang nahinabi sa Banat News sila si PO3 Alfredo Pagaling ug mga kaubanan maoy miresponde sa maong alarma ug naabtan ang biktima nga nagbuy-od na sa kalibunan.

Sumala pa ni Alinabo nanginhawa pa ang biktima dihang naabtan sa mga polis ug gidala sa Minglanilla District Hospital apan pagka 1:20 sa hapon namatay gyud kini samtang gi-atiman sa mga doktor.

Ang biktima nakaangkon og samad pinusilan sa walang bahin sa ulo, ubos nga bahin sa walang dughan ug luyong bahin sa dapidapi.

Atol sa imbestigasyon sa kapulisan ang mga molupyo sa maong lugar nakadungog og tulo ka sunod nga buto sa armas sa wala pa madiskubrehi ang biktima.

Nakuha diha sa crime scene ang duha ka buhing bala sa kalibre .45 ug laing tulo ka kabhang sa basiyo sa susamang kalibre.Ang kapolisan padayon pa sa pag-ila sa biktima ug sa pagtumbok sa mga mamumuno niini. (/EIM)  (BANAT NEWS)