CEBU, Philippines - Natusak sa mga bala ang kalawasan sa usa ka lalaki nga gipusil sa duha ka armadong lalaking nagsakay og motorsiklo sa dalan M.L. Quezon sa barangay Cabancalan, dakbayan sa Mandaue alas -9 pasado ang takna sa miaging gabii. Si PO2 Gil Tomada sa kapolisan sa Presinto 4 sa Mandaue City Police Office miila sa biktima nga mao si George Cortes, 29, nagpuyo sa maong dapit.
Gitug-an ni Tomada nga diha sa gawas sa ilang panimalay ang biktima ug nakig-inom sa iyang mga higala dihang kalit lang milabay ang duha ka wala mailhing mga lalaking nagsakay og motorsiklo ug nagsul-ob og helmet ug kalit lang namusil ngadto sa biktima.
Dugang pa ni Tomada nga ang mga kauban nga gikainom ni Cortes dali nga nanghapa sa yuta, ang duha ka mamumuno dali nga mipahilayo sa maong dapit sakay sa motorsiklo.
Si Tomada miingon nga nabulit ang kalawasan sa biktima sa mga samad pinusilan nga naglakip sa liog ug dali kining gidala sa North General Hospital apan gideklarar kini sa mga doktor nga dead on arrival. Nakuha diha sa crime scene ang unom ka mga kabhang sa kalibre .45 nga bala nga gituohang gikan sa armas nga gigamit sa mga mamumuno.
Ang sakop sa pamilya sa biktima mitug-an sa kapolisan nga niadtong miaging bulan adunay gikabangi ang biktima ug kaniadto gidauban ang traysikol sa biktima sa gikaaway niini. Kini maoy nag-una karon nga mga anggulo nga gisusi sa mga imbestigador sa kapolisan sa Presinto 5 aron mailhan ang mga namusil sa biktima. EIM (BANATNEWS)