Team Rama ug BOPK may lineup na

CEBU, Philippines - Ang Bando Osmeña Pundok-Kauswagan (BOPK) ug ang Team-RAMA nagdungan sa pagpahibalo sa publiko kagahapon sa ilang mga kandidato nga magpapili sa mga elective position dinhi sa dakbayan sa Sugbo sa eleksyon karong sunod tuig.

Ang BOPK pinaagi ni Kongresista Tomas Osmeña didto mopahibalo atol sa tigum sa mga barangay kapitan sa Grand Convention Center, samtang ang Team-RAMA mipahibalo atol sa tigum nga ilang gihimo didto sa White Gold Restaurant.

Si Osmeña maoy kandidato sa BOPK sa pagkamayor sa dakbayan samtang si Mayor Michael Rama magpasubli pag-usab. Sa pagka bise mayor, si Konsehal Edgardo Labella sa Team-RAMA nga moatbang ni reelectionist Vice Mayor Joy Augustus Young sa BOPK. Human nga si kanhi Kongresista Tony Cuenco miatras sa iyang tinguha nga molansar pagbalik diha sa south district, ang Team-RAMA mipahibalo nga si kanhi DOTC Undersecretary Aristotle Batuhan maoy modagan sa pagka kongresista sa south district.

Gani si Batuhan nanghagit dayon og debate ni Konsehal Rodrigo “Bebot” Abellanosa nga maoy kandidato sa BOPK sa south district, apan si Abellanosa walay tinguha nga makigdebate.

Ang mga kandidato sa BOPK pagkakonsehal sa south district mao sila si kanhi konsehal Gerry Carillo ug Gabby Leyson, Cogon-Pardo barangay captain Eugenio Gabuya, incumbent councilors Augustus Pe Jr., Roberto Cabarrubias, Ritchie Osmeña, Margot Osmeña, ug konsehal sa Labangon nga si Zenaida Amores.

Sa Team-Rama sa south district mao sila si Althea Lim, Hunt Abella, James Cuenco, Lotlot Ignacio, Dave Tumulak, Trixia Ylaya, City Nutrition Officer Ronald Diola ug kanhi konsehal Procopio Fernandez. Sa north district sa Team-Rama mao sila si Busay Barangay Captain Yody Sanchez, kanhi konsehal Sylvan “Jack” Jakosalem, kanhi Ermita Barangay captain Felicisimo Rupinta, Sambag 1 barangay captain Jerry Guardo, Agsungot barangay captain Pastor Alcover II, kanhi konsehal Edwin Jagmoc, Bobby Vincent Kintanar ug Lahug Konsehal Mary Ann Delos Santos.

Ang ilang ikakontra sa BOPK mao sila si incumbent city councilors Lea Japson, Nida Cabrera, Michael Ralota, Alvin Arcilla, Alvin Dizon, Sisinio Andales, Noel Wenceslao ug kanhi konsehal Nestor Archival.  (BANAT NEWS)