Sotto Bill maaprobahan na sa sunod tuig

CEBU, Philippines - Gikatakda nga sa dili pa ang eleksiyon sa sunod tuig maaprobahan na ang Senate Bill No. 41 nga nag-amendar sa Akta Republika 53 kon “Sotto Law”.

Si Senador Vicente Sotto III kinsa maoy usa sa guests speaker sa Political and Media Challenges Forum nga gipahigayon sa Marcelo Fernan, Cebu Press Center sa Ecotech, Lahug, dakbayan sa Sugbo mibutyag nga ang Akta Republika 53 giduso na kaniadto sa iyang apohan nga si kanhi Senador Vicente Yap Sotto.

Ang Section 1 sa Akta Republika 53 nagkanayon nga “the publisher, editor or duly accredited reporter of any newspaper, magazine or periodical of general circulation cannot be compelled to reveal the source of any news-report or information appearing in said publication which was related in confidence to such publisher, editor or reporter, unless the court or a House or committee of Congress finds that such revelation is demanded by the interest of the State”.

Matud ni Sotto nga ang telebisyon, radyo ug social media wala malakip sa maong balaod hinungdan nga miduso siya og bill sa pag-amendar niini.

Hinuon matud ni Sotto nga ang mga opisyal ug kawani sa gobiyerno isip public servant dili sila pweding mag-onion skin sa mga pagsaway kanila sa press tungod kay lakip kini sa territory ug hazard sa ilang trabaho.

Usahay matud usab ni Sotto nga ang pagsaway sa press makapamata kanila ug maisip kining alarm bell aron magtinarong sila sa ilang serbisyo. (BANAT NEWS)