Yapha andam na batok Gwen

CEBU, Philippines - Gihangop ni Pinamungahan Mayor Geraldine Yapha ang desisyon ni Governor Gwendolyn Garcia pagkanselar sa iyang laraw sa pagka-senador ug magpapili nalang isip kongresista sa ika-tulong distrito sa lalawigan sa Sugbo ubos sa Once Cebu Party.

Si mayor Yapha kinsa maoy posibling kandidato pagka -kongresista sa Liberal Party (LP) sa 3rd district mitataw nga gihangop niya ang maong kalambuan tungod kay nahibaw-an na nila karon ang mahimo nilang kaatbang sa umaabot nga piniliay sa ikatulong distrito

Hinuon giklaro ni Yapha nga wala sila masurprisa niini tungod kay daan na niyang napanglantawan nga mokandidato gyud si Garcia sa pagka-kongresista sa maong distrito human kini mobalhin og rehistro sa lungsod sa Barili nga nasakop sa 3rd district.

Giangkon hinuon ni Yapha nga lig-on ang gobernador tungod sa empluwensiya niini ug kwarta apan giklaro niya nga mas nakabentaha siya tungod kay lumad man gyud siya nga molupyo sa maong distrito.

Dugang niya nga wala gyud siya mobati og bisan gamay’ng kabalaka nunot sa deklarasyon sa gobernador sa pagpadaus-os sa iyang kandidatora ngadto sa pagka-kongresista gikan sa pagka-senador.

Sa pagkakaron gipaabot nalang ni Yapha ang desisyon sa LP kun siya ba gayud ang himoong official candidate niini sa pagka-kongresista sa ika-tulong distrito sa lalawigan sa Sugbo.

Midugang si Mayor Yapha nga sigurado na nga si Engr. Gigi Sanchez Zaballero, anak ni anhing vice governor Greg Sanchez Jr., ang kandidato nila sa pagka-board member sa distrito ug ang paris niini mahibaw-an sa mosunod nga mga adlaw sa dili pa ang sinang-atay sa certificate of candidacy karong Oktubre 1-5.

Samtang si LP governatorial bet Junjun Davide III uban sa iyang runningmate nga si Vice Governor Agnes Magpale maoy gipaabot nga moatbang sa One Cebu candidate nga si Cong. Pablo John Garcia ug runningmate niini nga si kanhi Danao City vice mayor Boboy Durano. (/WC) (BANAT NEWS)