Motor natagak sa kanal 3 angol

CEBU, Philippines - Tulo ang angol nga sakay sa natagak sa kanal nga motorsiklo didto sa barangay Langtad, siyudad sa Naga kagahapon sa alas 3:30 sa kaadlawon.

Ang mga biktima mao ang driver nga si Dionisio Bacalso, 30, minyo, ug taga Sitio Suba, barangay Sangat, San Fernando ug ang duha ka angkas niini nga sila si Joseph Capaycapay, 28, nga taga Pitalo, San Fernando, ug Rafael Mission, 26, pulos ulitawo, nga taga Sitio Suba, Sangat, sa maong lungsod kinsa pulos trabahante sa shipyard sa Sangat.

Si PO3 Remberto Empeynado sa Naga City Police Station mibutyag sa Banat News nga ang maong mga trabahante gikan pa sa ilang gitrabahoan, ug human sa ilang duty misakay sa motor, paingon sa siyudad sa Naga.

Apan gumikan malagmit  sa kaanindot padaganon sa motorsiklo kay hayahay kaayo ug bugnaw ang hangin nga mohapyud sa lawas sa magsakay niini, gipabulhotan kini og padagan   ni Bacalso, apan pag-abot sa kurbadahong bahin   sa maong lugar wala na siya makontrol sa dagan sa iyang sakyanan ug imbis mosubay sa karsada didto hinuon motugpa sa kanal nga may giladmon nga upat ka metros.

Hinuon mga ginagmay’ng bali sa kabukogan sa lawas mao ray ilang nahiagoman ug dili kabalak-an ang ilang kahimtang sumala sa kapolisan nga miresponde sa maong hitabo.

Hinuon gidala sila sa tambalanan sa dakbayan sa Sugbo aron pagtino sa kaluwasan sa ilang kinabuhi. (/WC)  (BANAT NEWS)