CEBU, Philippines - Ipahigayon ugmang adlawa Septiyembre 22 ang 28th Coastal and 24th Urban Clean-up sa 52 ka mga coastal ug urban barangays sa siyudad sa Sugbo uban sa nagkadaiyang mga opisyales sa barangay, volunteers sa nagkadaiya nga sektor, empleyado sa Cebu City Hall ug mga tinun-an sa nagkadaiya nga tunghaan sa dakbayan.
Tumong sa maong programa nga gipangulohan sa Coastal Management Board (CMB) nga magpabilin nga limpiyo ang mga kasapaan sa siyudad aron malikayan maungot ang mga basura nga maoy rason mga pagbaha.
Gidasig sa pangulo sa CMB nga si Peter Cuizon ang tanang residente sa siyudad nga moduyog sa maong kalihukan pinaagi usab sa pagpanglimpyo sa ilang mga tugkaran ilabi na kadtong namuyo dapit sa sapa.
“Magtinabangay tang tanan, kay para sa ato raman pud ni aron malikayan ang dakong baha,” matud pa ni Cuizon.
Mapasalamaton usab si Cuizon gumikan kay mohatag usab sa ilang partisipasyon sa maong kalihukan ang pipila ka mga non-government organizations.
Dugang pa niya nga sa miaging clean-up drive, nakahipos sila og kapin sa 200 ka tonelada nga basura.
Aminado si Cuizon nga wala gihapon nahuman ang suliran sa baha sa dakbayan busa dako kaayo og matabang ang katawhan niini pinaagi sa saktong paglabay sa basura ug kinahanglan nga dili kini angay ilabay sa sapa.
Mohatag usab og kooperasyon sa maong kalihukan ang Department of Public and Services pinaagi sa pagpadala sa ilang mga street cleaners ug garbage collectors. (BANAT NEWS)