CEBU, Philippines - Maayong pagkabuslot sa dughan sa usa ka manindahay og chorizo human kini giunay og pusil sa iyang silingan pasado alas-12 sa tungang gabii diha sa dalan Tres de Abril sa barangay Pahina Central sa siyudad sa Sugbo.
Ang biktima nailhan nga si Emmanuel Jumaoas, 29, molupyo sa maong lugar ug nakaangkon og samad pinusilan sa iyang dughan samtang ang suspetsado nailhan usab nga Jonathan Bacus. Sa pakighinabi sa Banat News ni SPO1 Ruth Violanggo sa Homicide Section sa Cebu City Police Office, mibutyag base sa ilang nakuha nga impormasyon nga ang biktima mitambong sa birthday party sa higala sa suspek.
Apan atol sa lipaylipay kalit mipasalba og armas ang suspek hinungdan nga gibadlong sa biktima apan imbes nga mopatuo naglalis hinuon ang duha ug miresulta sa pagpusil sa suspek ngadto sa biktima.
Ang mga tawo nga diha sa maong selebrasyon nga mikaratil og panagan mitug-an sa kapolisan nga lakip sa midagan ang biktima apan nahibulong silang may misirit nga dugo sa dughan niini. Daling gidala sa Cebu City Medical Center ang biktima apan gideklarar kini nga dead on arrival samtang daling miikyas ang suspek padulong sa barangay Guba ning siyudad.
Sa gihimong hot pursuit operation nadakpan ang suspek sa maong barangay. Si Violanggo miingon nga ilahang subayon kung dili lang tungod sa kahubog ang motibo sa pagpusil. (BANAT NEWS)