Kawatan migamit og crane ekipo sa barko gikawat
CEBU, Philippines - Natanggong ang usa ka watchman sa usa ka de pasaheroan nga barko human gipasanginlang mikawat sa turbo charger sa barko nga nagkantidad og P1.2 million niadtong miaging semana sa Barangay Sangat, San Fernando.
Apan niadtong Miyerkules lang misumbong sa kapulisan ang chief engineer sa barko nga si Roberto Daizon tungod sa kahadlok nga panimaslan sa usa sa tulo ka mga suspetsadong giingong armado.
Si Dennis Rodinca, 23, taga-Barangay Ilaya, Ronda mao lay naaresto ni Daizon samtang ang duha ka kaubanan niini nga sila si Eric Alejandra ug Felix Estopa nakaipsot.
Si Insp. Crisanto Abella, deputy chief sa San Fernando Police Station, mibutyag nga naghimo og routine inspection si Daizon samtang anaa ang barko sa pantalan sa Sangat dihang namatikdan niini nga nahanaw na ang turbo charger nga anaa sa cargo hold track deck.
Daling gisukna ni Daizon si Rodinca nga mibutyag ra usab nga kauban niya ang mikuha niini nga sila si Alejandra ug Estopa pinaagi sa paggamit og crane ug gibutang ngadto sa usa ka cargo truck.
Giangkon usab si Rodinca nga gihatagan siya og P25,000 ni Estopa bugti sa iyang pagtabang. Kasong qualified theft ang ipasaka ni Daizon batok sa mga suspetsado. (BANAT NEWS)
- Latest
- Trending
