Martial Law
1972—Karong petsaha gideklarar sa diktador nga si Ferdinand Marcos sa Pilipinas ang Proclamation 1081 o Martial Law. Tungod sa Martial Law gisuspenso ang civil rights sa publiko ug nahimong awtoridad ang militar. Matud pang Marcos ang deklarasyon gikinahanglan aron hatagan og dugang gahom ang gobiyerno batok sa gihulagway niyang pagdaghan sa mga rebeldeng komunista ug Muslim ug nagkadaghang mga vigilante. Miinsister si Marcos nga pinaagi niini mas mapadali ang paglutos sa mga nagpasiugda sa kasamok. Usa sa nahimong pabilo sa deklarasyon sa Martial Law mao ang gialegar nga ‘ambush me’ sa kaniadto Minister of Defense nga si karon Senate Majority Floor Leader Juan Ponce Enrile. Naputol ang Martial Law dihang nag-alsa pinaagi sa People Power niadtong 1986 ang mga Filipino nga pugsanong nakapalayas sa mga Marcos diha sa Malacañang.
“Bubble Boy”
1971—Natawo ang Amerikanong pasyente nga si David Vetter. Siya ang gitawag nga “bubble boy” tungod kay sukad sa iyang pagpanganak wala kini makatunob sa yuta o bisan unsang bahin sa iyang palibot. Siya adunay genetic disease nga severe combined deficiency syndrome (SCID) nga peligro sa iyang panglawas ang matakbuyan bisan unsang matang sa kagaw. Aron maprotihian siya gikan sa kagaw gisulod siya sa usa ka plastic nga bola. Gisuwayan unta siya pagtambal pinaagi sa bone marrow stem cell transplant gikan sa bone marrow sa iyang igsuon apan aduna kini Epstein-Barr virus nga nakaingon sa sakit niyang Burkitt's lymphoma nga nadiskubrehang hinungdan pud diay sa sakit nga kanser. Tungod niini, gitugotan sa mga doktor si David nga makagawas sa bubble, dangtan 15 ka adlaw namatay siya sa edad nga 12-anyos.
Petisyon sa pagparehistro ni Rex ‘Wakee’ Salud sa Cordova gibasura
Gibasura sa Municipal Circuit Trial Court ang petisyon ni boxing promoter Rex “Wakee” Salud nga iapil siya isip rehistradong botante sa lungsod sa Cordova diin gikataho nga siya modagan pagka-mayor sunod eleksiyon.
Sa iyang unom ka pahina nga desisyon niadtong Septiyembre 11, 2012, si MCTC Judge Jocelyn Uy-Po miingon nga way nakitang sayop ang korte sa nahaunang desisyon sa Election Registration Board sa Cordova sa pagbasura sa aplikasyon ni Salud isip botante.
Hinuon ang korte mitambag kang Salud sa pagparehistro og usab sa Commission on Elections ug kompletohon ang rekisitos aron mahimo siyang kwalipikado nga botante.
Ang ERB nga gipangulohan ni election officer Arvin Maghanoy mibasura sa aplikasyon ni Salud sa pagbalhin pagrehistro gikan sa dakbayan sa Sugbo human usa ka Vicente Dinoy ang mibabag gumikan kay dili residente si Salud sa barangay Cogon, Cordova.
Si Salud nangangkon nga sukad pa sa 2011 siya nagpuyo sa lugar sa panimay ni barangay kapitan Andres Dinoy.
Nisusi sa lugar ang korte kauban sa mga abogado ug nasuta nga ang kwarto nga giingong giabangan ni Salud walay bisan usa niya ka gamit.
Ang katre giingong dili paigo higdaan ni Salud ug igo lang kini sa bata samtang ang balay walay klarong pultahan.
Matud pa sa huwis nga si Salud miingon nga wala pa siya makahukom sa pagpuyo nga permanente sa maong lugar apan magbisitahan na siya niini.
Dili kombinsido ang korte sa pangangkon ni Salud nga residenti siya sa Cogon, Cordova.
Ang balaud nagkanayun nga kinahanglan ang usa ka langyaw nagpuyo unom ka buwan sa lungsod diin siya gustong mobotar sa dili pa ang eleksiyon. (BANAT NEWS)