CEBU, Philippines - Naluwas ang Kapitan sa Barangay Caubian sa Isla sa Olango uban sa iyang pamilya gikan sa nalunod nga pumpboat nga gisakyan nila didto sa kadagatan sa Barangay Sta. Rosa, sa maong Isla sa milabay’ng gabii.
Nasayran sa Banat News nga ang pagkalunod ni Kapitan Romeo Matbangon nahiatol sa kasaulogan niya sa iyang ika-70 nga birthday. Si Lapulapu City Mayor Paz Radaza human masayud sa nahitabo kang Matbangon uban sa duha ka anak niini nga nagpangidaron og 12 ug 13 anyos, nalipay kaayo.
Nasayran nga ang pumpboat nga gisakyan ni Matbangon mibiya sa baybayon sa Angasil, sa Barangay Mactan padung sa Isla sa Caubian sa alas 6:00 sa milabay’ng hapon apan gumikan sa dagkong bawod sa dagat nalunod ang maong pumpboat.
Ang mga biktima naglutawlutaw nalang sa kadagatan sulod sa usa ka oras ug ang milabay nga pumpboat nga pasaherohan maoy milluwas kanila.
Gumikan usab sa dautang kahimtang sa panahon gikanselar ni Mayor Radaza ang iyang gitakdang pagbisita unta ngadto sa Isla sa Caubian kagahapon alang sa soft opening sa "Eco Tourism program" niini didto sa Isla sa Olango.
Lakip sa susihon ni Mayor Radaza mao ang Minantaw Marine Park and Sanctuary sa Isla sa Olango diin makita ang mga nindot nga matang sa kinaiyahan ilawom sa kadagatan sa maong Isla. (BANAT NEWS)