CELF ug DOH usa sa kampanya batok lymphatic filariasis

CEBU, Philippines - Aron matuman ang misyon pagluwas sa nasud gikan sa sakit  nga lymphatic filariasis sa tuig 2017, ang Coalition for the Elimination of Lymphatic Filariasis (LF)(CELF) misuporta sa programa sa Department of Health (DOH) pagsangyaw sa kasayoran bahin sa paglikay sa sakit nga LF.

Gibutyag ni Dr. Jaime Galvez Tan, executive director sa National Institute of Health ug usa sa mga opisyal sa CELF nga kining maong matang sa sakit kalit lang   nga mutapot sa tawo.

Midugang siya nga anha na kini mamatikdi kun ang bahin sa lawas sa tawo moburot na o lahi sa naandan, sama sa usa ka bukton nga dako kay sa usa, bitiis nga mohupong dako kay sa usa, lagay sa tawo nga moburot, suso sa babaye nga mohupong lahi sa naandan ug uban pang bahin sa lawas sa tawo nga may abnormalidad nga gidak-on.

Kining tanan sumala sa pagpasabot ni Tan nga naggumikan sa lamok nga maoy magdala sa sakit nga lymphatic filariasis nga mopaak sa asang bahin sa lawas sa tawo.

Matud pa niya nga ang maong matang sa lamok nga maggikan sa kasagingan, abakahan ug mga kalibonan, lahi sa lamok nga magdala sa dengue.

Dili makamatay ang lymphatic filariasis nga sakit apan mag-antos ang mataptan niini sa abnormal nga kahimtang sa asang bahin sa iyang lawas nga  mokupos lamang kun makatomar og tambal nga mobugno sa kagaw ning maong matang sa sakit.

Busa matud pa ni Tan musangpot sa pagkadisturbo sa panginabuhi sa usa ka tawo nga mataptan ning maong matang sakit.

Gitataw sa   grupo nga CELF nga aron mawagtang ang sakit nga lymphatic filariasis, gitukod sa DOH ang National Filariasis Elimination Program (NFEP) nga naghan-ay sa mga aktibidad ug serbisyo ngadto sa publiko.

Ang mga nag-unang aktibidad sa CELF naglangkob sa pagpasalmot sa publiko sa ilang Mass Drug Administration (MDA), pag-umol og mga adbokasiya alang sa kaalam bahin sa lymphatic filariasis ug uban pang gimbuhaton nga maghatag og higayon sa publiko sa pagpakabana bahin ning maong matang sa sakit ug sa angay nilang buhaton aron makalikay niini.

Si Assistant Secretary Paulyn Ubial, sa Visayas Cluster sa CELF nagkanayon nga hingpit nilang gisuportahan ang Executive Order No. 369   nga nagdeklarar   nga matag buwan sa Nobiyembre isip National Lymphatic Filariasis Month. Ang buhaton sa CELF niini kaabag sa taga DOH ug mga barangay health worker mao ang pagpang-apud-apod og libreng tambal nga albendazole ug diethyl carbamazine ngadto sa publiko.

Gipasabot ni Ubial nga bisan wala kining sakita dinhi sa lalawigan sa Cebu apan kinahanglang motumar ang publiko niini gikan sa nag-edad og dos anyos ngadto sa 65 anyos aron makalikay ning maong matang sa balatian. (/WC) (BANAT NEWS)