CEBU, Philippines - Nasuta sa kagamhanan sa lalawigan sa Sugbo nga nagkadaghan ang mga aplikante og trabaho para gawas sa nasud dinhi sa lalawigan ug sa mga kasikbit nga mga probinsiya, matud pa ni Dr. Mathea Baguia, ang Capitol Consultant on Labor Market Information sa Kapitolyo.
Napanid-an kini ni Baguia base sa rekord nga nahipos sa Public Employment Services Office (PESO) Capitol sa nanglabay nga mga overseas job fair nga gilusad niini.
Matud pa ni Baguia nga karon pang daan aduna nay mokapin sa 200 na ka mga job applicant ang nagparehistro na sa ilang buhatan alang sa overseas job fair sa PESO Capitol karong Oktubre 21 ning tuiga, didto gihapon sa Cebu International Convention Center ( CICC) sa siyudad sa Mandaue.
Matud pa sa pangulo sa PESO Capitol nga ilang napanglangtawan nga mokapin sa 2,000 ka mga aplikante ang moparehistro sa nahisgutang job fair.
Gitumbok usab ni Baguia nga usa sa nakapadaghan sa mga aplikante nga buot motrabaho sa gawas sa nasud mao ang nagkadaghang kompanya ug mga lisensiyadong international recruitment agency nga musalmot sa overseas job fair nga ilang ipahigayon.
Gawas sa nagparehistro sa ilang buhatan karon pang daan, ila usab nga gipaabot nga modaghan ang magparehistro unya na mismo sa adlaw sa overseas job fair aron ilang mapahimuslan ang gitanyag sa PESO nga one stop shop nga serbisyo.
Sa maong sistema ang mga serbisyo sa nagkadaiyang mga national government agency sama sa NBI, NSO mapahimuslan usab sa mga aplikante nga madawat sa trabaho didto gihapon sa CICC aron mausa ra ang paghikay sa mga papeles nga kinahanglanon sa mga hingtungdan alang sa sudlan nilang trabaho sa gawas sa nasud.
Dugang pagpasabot ni Baguia nga usa sa napadani sa mga recruitment agency sa pagsalmot sa ipahigayong overseas job fair mao ang bag-o lang nadawat nilang special recruitment authority gikan sa Philippine Overseas Employment Authority (POEA). (/WC) (BANAT NEWS)